Samarqand va Namanganda profilaktika inspektorlari pora bilan ushlandi
Bir inspektor sobiq IIB xodimini ishga tiklashni va’da qilgan, boshqa biri esa fuqaroga nisbatan arizani ko‘rib chiqmagan va noqonuniy faoliyatiga ko‘maklashmoqchi bo‘lgan.
Samarqand va Namanganda ikki profilaktika inspektori korrupsiyada gumonlanib qo‘lga olindi. Bu haqda DXX xabar berdi.
Ma’lum qilinishicha, Samarqand shahar IIO FMB profilaktika inspektori mansabdor tanishlari orqali sobiq ichki ishlar organi xodimini tizimga qayta ishga tiklashda yordam berishni va’da qilib, buning evaziga 7 ming AQSH dollari olgan vaqtida ashyoviy dalillar bilan ushlangan.
Mazkur holat yuzasidan unga nisbatan Jinoyat kodeksining 168 va 211-moddalari bilan jinoyat ishi qo‘zg‘atilib, tergov harakatlari olib borilmoqda.
Yana bir holatda Namangan viloyatining Chust tumani IIB profilaktika inspektori 1994-yilda tug‘ilgan fuqaroga nisbatan kelib tushgan arizani ko‘rib chiqmasdan qoldirganini ro‘kach qilib, undan 2 ming AQSH dollari talab qilgani aniqlangan. U joriy yil fevral oyida ushbu mablag‘ning 700 dollarini olgan.
Tergov ma’lumotlariga ko‘ra, inspektor noqonuniy harakatlarini davom ettirib, fuqarodan qolgan 1300 dollarni hamda kelgusida uni O‘zbekiston–Qirg‘iziston davlat chegarasi orqali chorva mollarini noqonuniy olib o‘tishda qo‘llab-quvvatlash evaziga yana 2 ming dollar talab qilgan. Shu tariqa u jami 3300 AQSH dollari olishni ko‘zlagan.
Davlat xavfsizlik xizmati, Bosh prokuratura huzuridagi Departament hamda IIV Shaxsiy xavfsizlik bosh boshqarmasi xodimlari hamkorligida o‘tkazilgan tezkor tadbirda profilaktika inspektori so‘ralgan pul mablag‘larini olayotgan vaqtida ushlandi.
Mazkur holat bo‘yicha unga nisbatan Jinoyat kodeksining 165 va 168-moddalari bilan jinoyat ishi qo‘zg‘atilgan. Hozirda tergov harakatlari davom ettirilmoqda.
