Janubiy Koreyaning sobiq prezidenti 30 yilga qamaldi
Yun Sok Yol Shimoliy Koreyaga dron yuborish operatsiyasini tashkil etishda aybdor deb topildi.
Janubiy Koreyaning Seul markaziy sudi mamlakat sobiq prezidenti Yun Sok Yolni Shimoliy Koreya hududiga dronlar yuborish bilan bog‘liq ish bo‘yicha 30 yil muddatga ozodlikdan mahrum qildi. Bu haqda Yonhap axborot agentligi xabar berdi.
Sud materiallariga ko‘ra, sobiq prezident 2024-yilda Shimoliy Koreya hududiga dronlar yuborish operatsiyasini tashkil etishda aybdor deb topilgan. Tergov ma’lumotlariga ko‘ra, ushbu harakatlar Koreya yarimorolida keskinlikni kuchaytirish va keyinchalik harbiy holat joriy etish uchun asos yaratishga qaratilgan bo‘lgan.
Mazkur ish doirasida sobiq mudofaa vaziri Kim Yong-hyun ham 30 yilga ozodlikdan mahrum qilingan. Sud qarorida ayblanuvchilar Shimoliy Koreya tomonidan javob harakatlarini qo‘zg‘atish maqsadida harbiy operatsiyalardan foydalangani qayd etilgan.
Bu Yun Sok Yolga nisbatan chiqarilgan ilk og‘ir hukm emas. Avvalroq u 2024-yil dekabr oyida joriy etilgan harbiy holat bilan bog‘liq isyon ishida ham umrbod qamoq jazosiga hukm qilingan edi.
