Jenevada AQSh–Eron kelishuvi imzolanishi kutilmoqda
Diplomatik manbalarga ko‘ra, AQSh va Eron o‘rtasidagi muzokaralar hal qiluvchi bosqichga yetgan.
AQSh va Eron o‘rtasida muhim memorandum imzolanishi kutilmoqda. Axios nashri jurnalisti Barak Ravidning xabardor manbaga tayanib ma’lum qilishicha, AQSh Harbiy-havo kuchlari Shveytsariyaning Jeneva shahriga ehtimoliy imzolash marosimi uchun zarur uskunalarni yetkazishni boshlagan.
Ma’lum qilinishicha, agar memorandum imzolanishi bo‘yicha yakuniy kelishuvga erishilsa, marosimda AQSh vitse-prezidenti J.D. Vens ham ishtirok etishi mumkin.
Manbalarga ko‘ra, AQSh va Eron vakillari hujjat matni yuzasidan dastlabki kelishuvga erishgan. Biroq memorandum kuchga kirishi uchun tomonlarning yakuniy roziligi va rasmiy tasdig‘i talab etiladi.
Avvalroq AQSh prezidenti Donald Tramp Eron bilan mojaroni tugatishga qaratilgan “katta kelishuv” tayyorlanayotganini ma’lum qilgan edi. Uning ta’kidlashicha, hujjatlar deyarli tayyor bo‘lib, imzolash marosimi Yevropada o‘tkazilishi mumkin.
Shuningdek, Tramp muzokaralar yuqori bosqichga chiqqani sababli Eronga qarshi rejalashtirilgan harbiy zarbalar bekor qilinganini bildirgan. Hozircha kelishuv yuzasidan AQSh va Eron tomonidan yakuniy rasmiy bayonot berilmagan.
