O‘zbekistonda “voyenkomat”lar tugatilayotgani yo‘q — Mudofaa vazirligi
Vazirlik mamlakatda mudofaa ishlari organlari faoliyati tugatilmayotganini, aksincha, tizim zamonaviy talablar asosida takomillashtirilayotganini bildirdi.
Ijtimoiy tarmoqlarda O‘zbekistonda mudofaa ishlari bo‘limlari (“voyenkomat”lar) bosqichma-bosqich tugatilishi haqidagi xabarlar tarqaldi. Mudofaa vazirligi ushbu ma’lumotlar noto‘g‘ri talqin qilinganini bildirib, rasmiy munosabat bilan chiqdi.
8-iyun kuni prezidentga mudofaa sohasidagi ayrim masalalar yuzasidan taqdimot o‘tkazilgan. Unda mudofaa ishlari organlari faoliyatini raqamlashtirish, ularni elektron hukumat tizimi bilan integratsiya qilish, ma’lumotlar almashinuvini tezlashtirish hamda fuqarolarga ko‘rsatilayotgan xizmatlar sifatini oshirishga qaratilgan takliflar ko‘rib chiqilgan.
Taqdimotda harbiy hisobga olish, tibbiy va chaqiruv komissiyalari faoliyatini raqamlashtirish bo‘yicha tashabbuslar ham muhokama qilingan. Xususan, 16 yoshga to‘lib, ID-karta olgan o‘g‘il bolalar haqidagi ma’lumotlarni Ichki ishlar vazirligining axborot tizimidan olish va ularni avtomatik tarzda harbiy hisobga qo‘yish tartibini joriy etish rejalashtirilmoqda.
Shuningdek, mudofaa ishlari bo‘limlarida tibbiy komissiyadan o‘tish amaliyotini bekor qilish, tibbiy ko‘riklarni esa tuman va shahar markaziy ko‘p tarmoqli poliklinikalarida tashkil etish taklif etilgan.
Mudofaa vazirligi mamlakatda mudofaa ishlari organlari faoliyati tugatilmayotganini, aksincha, tizim zamonaviy talablar asosida takomillashtirilayotganini ta’kidladi. Vazirlikka ko‘ra, raqamli xizmatlarni joriy etishdan maqsad byurokratik jarayonlar va fuqarolarning ortiqcha ovoragarchiligini kamaytirishdan iborat.
