Tramp Eronga rejalashtirilgan zarbalar bekor qilinganini ma’lum qildi
Zarba berish rejalari bekor qilingan bo‘lsa-da, dengiz blokadasi hozircha saqlanib qoladi.
AQSH prezidenti Donald Tramp Eronga qarshi rejalashtirilgan harbiy zarbalar bekor qilinganini ma’lum qildi hamda Tehron bilan kelishuv imzolash imkoniyati saqlanib qolayotganini ta’kidladi.
Trampning bildirishicha, Eron bilan olib borilgan muzokaralar mamlakat rahbariyatining eng yuqori darajasida ko‘rib chiqilgan va ma’qullangan. Shu sababli AQSH tomonidan rejalashtirilgan hujum va bombardimonlar to‘xtatilgan.
“Bugun kechqurun Eronga rejalashtirilgan hujumlar va bombardimonlarni bekor qildim”, — deb yozgan AQSH prezidenti Truth Social ijtimoiy tarmog‘idagi sahifasida.
Uning so‘zlariga ko‘ra, muzokaralar doirasida shakllantirilgan yakuniy yondashuvlar tomonlar tomonidan qo‘llab-quvvatlangan. Biroq ehtimoliy kelishuvning mazmuni va shartlari hozircha oshkor qilinmagan.
Tramp kelishuvni imzolash sanasi va joyi yaqin kunlarda ma’lum qilinishini bildirgan. Shu bilan birga, Eron portlariga nisbatan joriy etilgan dengiz blokadasi yakuniy kelishuv rasmiylashtirilguniga qadar saqlanib qolishini qayd etgan.
AQSH prezidenti mazkur bayonotni Eronga nisbatan “juda qattiq zarba” berilishi mumkinligi hamda mamlakatning asosiy neft infratuzilmasi ustidan nazorat o‘rnatilishi haqida bergan avvalgi bayonotlaridan bir necha soat o‘tib e’lon qilgan.
