Ali Xomanaiy 9-iyul kuni Mashhadda dafn etiladi
4–9-iyul kunlari Tehron, Qum va Mashhadda Xomanaiy bilan vidolashuv marosimlari o‘tkaziladi.
Eron davlat ommaviy axborot vositalari mamlakat sobiq oliy rahbari Ali Xomanaiyning dafn marosimi va vidolashuv tadbirlari o‘tkaziladigan sanalar hamda joylar bo‘yicha rasmiy ma’lumotlarni e’lon qildi deb xabar beradi Reuters.
Unga ko‘ra, vidolashuv marosimlari 4–5-iyul kunlari Tehron shahrida, Imom Xomeyni nomidagi masjidda boshlanadi. Bu bosqichda marhum bilan rasmiy xayrlashuv tadbirlari o‘tkaziladi.
Keyingi marosim 7-iyul kuni Qum shahrida tashkil etiladi. Ushbu bosqichda ham keng jamoatchilik va rasmiylar ishtirokida vidolashuv tadbirlari davom ettiriladi.
Yakuniy dafn marosimi esa 9-iyul kuni Mashhad shahrida bo‘lib o‘tadi. Marhumning jasadi Mashhaddagi Imom Rizo ziyoratgohida dafn etilishi rejalashtirilgan.
Rasmiy ma’lumotlarda ta’kidlanishicha, marosimlar ketma-ketligi 4–9-iyul kunlari oralig‘ida uchta shaharda o‘tkaziladi hamda har bir bosqich belgilangan tartibda tashkil etiladi.
Eslatib o‘tamiz, Ali Xomanaiy 2026-yil 28-fevral kuni Tehronga uyushtirilgan havo hujumlari oqibatida halok bo‘lgan edi. Uning vafotidan so‘ng mamlakatdagi xavfsizlik vaziyati hamda davom etayotgan harbiy harakatlar sabab vidolashuv marosimlari o‘tkazilmagan. Eron rasmiylari marosimlarni tashkil etish uchun zarur infratuzilma va xavfsizlik choralarini tayyorlash maqsadida tadbirlarni keyinga qoldirgan edi.
