Toshkentda noqonuniy qurol sotgan shaxslar ushlandi
Sergeli tumanida ruxsatnomasiz saqlanib, bir necha bor sotilgan pnevmatik qurol aniqlandi. Holat yuzasidan to‘rt nafar fuqaroga nisbatan ma’muriy chora ko‘rildi.
Toshkent shahrining Sergeli tumanida pnevmatik qurolni noqonuniy ravishda saqlash va uning oldi-sotdisi bilan shug‘ullangan fuqarolar aniqlandi. Bu haqda poytaxt IIBB axborot xizmati ma’lum qildi.
Qayd etilishicha, Sergeli tumani IIO FMB jinoyat qidiruv bo‘limi xodimlari tomonidan o‘tkazilgan tezkor tadbir davomida fuqarolardan birining xonadonida pnevmatik qurol saqlanayotgani aniqlangan.
O‘tkazilgan tekshiruvlar natijasida ushbu qurol tegishli hujjatlarsiz to‘rt nafar fuqaro o‘rtasida bir necha bor oldi-sotdi qilingani ma’lum bo‘lgan. Qurol oxirgi xaridorning uyida o‘tkazilgan tintuv vaqtida topilib, protsessual tartibda rasmiylashtirib olingan.
IIBB ma’lumotiga ko‘ra, “Qurol to‘g‘risida”gi qonunning 6-moddasiga asosan pnevmatik qurollar fuqaroviy qurol tasnifiga kiradi va ularni saqlash uchun tegishli ruxsatnoma talab etiladi. Aniqlangan fuqarolar esa qurolni hech qanday ruxsatnomasiz sotib olgan va saqlab kelgan.
Holat yuzasidan huquqbuzarlarga nisbatan Ma’muriy javobgarlik to‘g‘risidagi kodeksning 220-1-moddasi bilan ma’muriy choralar ko‘rilgan.
Shuningdek, qonunchilikka muvofiq, pnevmatik, signal beruvchi, tig‘li sovuq, uloqtirish hamda o‘zini o‘zi himoya qilish qurollarini ixtiyoriy ravishda topshirgan shaxslar ma’muriy javobgarlikdan ozod etilishi eslatib o‘tildi.
