Tramp Isroilning Livanga qilgan hujumini qoraladi
AQSH va Eron o‘rtasida muhim kelishuv imzolanishi kutilayotgan bir paytda Isroilning Bayrutga bergan zarbasi diplomatik jarayonlarga soya solgani aytilmoqda.
AQSH prezidenti Donald Tramp Isroilning Bayrut janubiga bergan zarbasi Eron bilan tinchlik kelishuviga erishish jarayoniga salbiy ta’sir ko‘rsatishi mumkinligini bildirib, hujum “bo‘lmasligi kerak edi” dedi. Bu haqda Reuters xabar berdi.
Shu bilan birga, Tramp Vashington va Tehron o‘rtasidagi kelishuv deyarli tayyor ekanini ta’kidladi.
“Biz mintaqaga, jumladan, Livanga tinchlik olib keladigan kelishuvga juda yaqinmiz. Barcha tomonlar to‘xtashi kerak. Livanda Isroilning boshqa hujumlari bo‘lmasligi kerak, lekin Hizbulloh kabi boshqa kuchlar tomonidan Isroilga qarshi hujumlar ham bo‘lmasligi kerak. Bu uzoq va go‘zal tinchlikning boshlanishi bo‘lishi mumkin - keling, bu imkoniyatni buzmaylik”, dedi Tramp.
Trampning bayonoti Isroilning Livandagi “Hizbulloh” nishonlariga bergan zarbasi ortidan yangradi. Eron rasmiylari ushbu hujumni AQSHning o‘z majburiyatlarini bajarishga qodir emasligining belgisi sifatida baholadi va javob choralari ko‘rilishi haqida ogohlantirdi.
Reuters manbalariga ko‘ra, AQSH va Eron o‘rtasida muhokama qilinayotgan kelishuv loyihasi muzlatilgan 25 milliard dollarlik Eron aktivlarini bo‘shatish, neft eksportiga qo‘yilgan ayrim cheklovlarni yumshatish hamda Hormuz bo‘g‘ozini qayta ochishni nazarda tutadi. Evaziga Tehron yadro quroli yaratmaslik va yadro dasturini cheklash bo‘yicha majburiyatlar olishi kerak.
Biroq Tehron hali hujjat bo‘yicha yakuniy qaror qabul qilmaganini bildirgan. Isroilning Livandagi so‘nggi harbiy amaliyoti esa muzokaralarning istiqboli borasidagi noaniqliklarni yanada kuchaytirmoqda. Urush va diplomatik sa’y-harakatlar fonida mintaqadagi keskinlik yuqori darajada saqlanib qolmoqda.
