Samarqandda 3 yoshli bola bog‘cha hududidagi suv havzasiga tushib ketib vafot etdi
Hozirda mazkur holat bo‘yicha tuman prokuraturasi tomonidan tergovga qadar surushtiruv ishlari olib borilmoqda.
Samarqand viloyatining Payariq tumanida joylashgan nodavlat maktabgacha ta’lim muassasasida 3 yoshli bola suv havzasiga tushib ketishi oqibatida vafot etdi. Bu haqda Samarqand viloyati Maktabgacha va maktab ta’limi boshqarmasi xabar berdi.
Ma’lum qilinishicha, hodisa 2026-yil 5-iyun kuni Payariq tumani “Sarbazor” MFY hududida joylashgan “Yulduzcha” nomli nodavlat bog‘chada sodir bo‘lgan. 2023-yilda tug‘ilgan R.M. bog‘cha hududida favqulodda holatlarda foydalanish uchun qurilgan suv havzasiga tushib ketgan va hayotdan ko‘z yumgan.
Mazkur holat yuzasidan tuman prokuraturasi tomonidan tergovga qadar tekshiruv ishlari olib borilmoqda. Mutasaddi idoralar marhum bolaning oila a’zolariga hamdardlik bildirdi.
Eslatib o'tamiz, avvalroq, Qashqadaryodagi xususiy bog‘chada uch yoshli bola avtomobilda unutib qoldirilishi oqibatida vafot etgani haqida xabar berilgan edi.
