Navoiyda savdo do‘konlari va omborxona yonib ketdi
Yong‘in qurshab olinganidan so‘ng qariyb bir soat ichida to‘liq bartaraf etildi. Jabrlanganlar haqida ma’lumot kelib tushmagan.
Navoiy viloyatining Uchquduq tumanida savdo do‘konlari va omborxonada yong‘in sodir bo‘ldi. Bu haqda viloyat Favqulodda vaziyatlar boshqarmasi ma’lum qildi.
Qayd etilishicha, 16-iyun kuni soat 18:35 da tumanning “Mustaqillik” mahallasida joylashgan “El Baraka Ul Haq” MChJ hamda “Lider Bazar” YaTTga tegishli oziq-ovqat va qurilish mollari savdo do‘konlari hamda omborxonasi yonayotgani haqida xabar kelib tushgan.
Yong‘in-qutqaruv ekipajlari voqea joyiga 18:38 da yetib borib, soat 19:06 da alangani qurshab olgan. Hodisani bartaraf etishga Uchquduq tumani FVB, NKMK AJ va “Navoiyuran” DKning jami olti ta yong‘in-qutqaruv ekipaji jalb qilingan. Yong‘in soat 20:05 da to‘liq o‘chirilgan.
Hodisa oqibatida savdo va qurilish mollari do‘konlarining qariyb 300 kvadrat metr maydoni yonib zararlangan. Shu bilan birga, savdo obyektlarining 2 ming kvadrat metr maydoni yong‘indan saqlab qolingan.
Dastlabki ma’lumotlarga ko‘ra, yong‘in oqibatida jabrlanganlar yo‘q.
