Messining otasi vafot etdi — teleboshlovchi
Xorxe Messining o‘limi haqidagi xabar tasdiqlanmadi, uni tarqatgan boshlovchi esa ishdan ketishini ma’lum qildi.
Argentinaning Luzu TV telekanali boshlovchisi Pena futbolchi Lionel Messining otasi Xorxe Messining vafoti haqida asossiz ma’lumot tarqatgani uchun omma oldida uzr so‘radi va o‘z lavozimini tark etishini ma’lum qildi.
Ma’lum qilinishicha, Luzu TV’ning El Show del Verano dasturi efirida Pena Xorxe Messi vafot etgani va bu sababli Lionel Messi Jahon chempionatini tark etishga majbur bo‘lishi mumkinligini aytgan. Oradan ko‘p o‘tmay ushbu ma’lumot tasdiqlanmagani ma’lum bo‘lgan.
18-iyun kuni teleboshlovchi rasmiy bayonot bilan chiqib, yo‘l qo‘yilgan xato uchun Messi oilasidan uzr so‘ragan. U mazkur ma’lumotni jonli efir vaqtida dastur prodyuserlari tomonidan tasdiqlangan xabar sifatida qabul qilgani, biroq xatodagi o‘z mas’uliyatini ham tan olishini bildirgan.
“Messi oilasi boshdan kechirayotgan og‘ir vaziyatda qo‘shimcha tashvish manbaiga aylanganimdan juda uyalaman. Xatodagi o‘z hissam uchun javobgarlikni zimmamga olaman va shu sababli Luzu TV’dagi faoliyatimni to‘xtatishga qaror qildim”, — degan Pena.
Shuningdek, Luzu TV rahbariyati mazkur voqea yuzasidan ichki tekshiruv o‘tkazilayotganini va dastur jamoasidagi bir qator xodimlar bilan ham xayrlashilishi mumkinligini ma’lum qilgan.
Avvalroq, Messi 2026-yilgi Jahon chempionatida Jazoirga qarshi bahsda gol urganidan so‘ng ko‘z yoshlarini tiyolmagani ortidan uning otasi Xorxe Messining salomatligi bilan bog‘liq muammolar haqida xabarlar tarqalgan edi. Biroq Messi oilasi Xorxe Messining vafot etgani haqidagi xabarlarni rad etgan.
Eslatib o'tamiz, avvalroq Britaniyaning Radio Caroline radiostansiyasi efir vaqtida texnik xatolik tufayli qirol Charlz III vafoti haqida noto‘g‘ri xabar e’lon qilingandi. Keyinchalik stansiya mazkur holat yuzasidan tinglovchilar hamda qirollik oilasidan rasman uzr so‘ragan.
