Tolibon Pokiston hududidagi ISHID nishonlariga zarba berganini ma’lum qildi
Tolibon zarbalar oqibatida guruhning yetakchi shaxslari yo‘q qilinganini bildirdi.
Tolibon Mudofaa vazirligi Afg‘oniston bilan qo‘shni Pokiston hududida ISHIDga aloqador deb ta’riflangan bir qator nishonlarga havo zarbalari amalga oshirilganini ma’lum qildi. Bu haqda Amu TV xabar berdi.
Vazirlik bayonotiga ko‘ra, operatsiya Balujiston va Xayber-Paxtunxva viloyatlarida joylashgan obyektlarni nishonga olgan. Xususan, Balujistonning Qila Abdulla tumanidagi Guliston hududi hamda Chagayi tumanidagi Shakarab hududida joylashgan ISHID-Xuroson (ISIS-K)ga tegishli deb ko‘rsatilgan obyektlar zarbaga uchragani bildirilgan.
Tolibon idorasi ushbu hududlar Afg‘oniston ichida rejalashtirilayotgan hujumlar uchun foydalanilganini iddao qilgan.
Shuningdek, Xayber-Paxtunxva viloyatining Orakzay tumani hududida ham qo‘shimcha nishonlarga zarba berilgani, ular ham ISIS-K bilan bog‘liq ekani qayd etilgan.
Tolibon zarbalar oqibatida guruhning “yetakchi shaxslari” yo‘q qilinganini da’vo qilgan, biroq bu borada hech qanday dalil yoki tasdiqlovchi ma’lumot taqdim etmagan.Pokiston hukumati mazkur holat yuzasidan hozircha rasmiy izoh bermagan.
Mazkur bayonot Tolibon va mintaqaviy davlatlar o‘rtasida ISIS-K faoliyati borasidagi uzoq yillik qarama-qarshiliklar fonida e’lon qilindi. BMT va bir qator xalqaro tashkilotlar Afg‘onistonda ISIS-K mavjudligi hamda uning mintaqa va undan tashqarida hujumlar uyushtirish salohiyati borasida muntazam xavotir bildirib keladi.
BMT monitoring hisobotlarida ushbu guruh Tolibonning aksilterror operatsiyalariga qaramay Afg‘oniston hududida faoliyatini davom ettirayotgani qayd etilgan.
Tolibon esa ISIS-K tahdidini ichki xavfsizlik nuqtayi nazaridan nisbatan past baholab, guruhning asosiy tayanch nuqtalari Pokiston hududida joylashganini ta’kidlab keladi.
