Rossiya maktablarida arab tili o'qitiladi
Ta’lim vazirligi arab tilini o‘qitish dasturini tasdiqladi, darslar 1-sentabrdan boshlanadi.
Rossiyada 2026/2027-o‘quv yilidan boshlab maktablarda arab tilini o‘qitish dasturi joriy etiladi. Bu haqda Rossiya ta’lim vaziri Sergey Kravtsov Moskva viloyatidagi Primakov nomidagi gimnaziyada joylashgan Shayxa Fotima bint Muborak ta’lim markaziga bag‘ishlangan yig‘ilishda ma’lum qilgan.
Rossiya hukumati matbuot xizmati xabariga ko‘ra, arab tilini o‘qitish bo‘yicha dastur tasdiqlangan bo‘lib, u 2026-yil 1-sentabrdan kuchga kiradi.
Yig‘ilishda Birlashgan Arab Amirliklari ta’lim vaziri Sara bint Yusef al-Amiri hamda BAAning Rossiyadagi favqulodda va muxtor elchisi Muhammad Ahmad Aljaber ishtirok etgan. Tomonlar ikki davlat o‘rtasidagi ta’lim sohasidagi hamkorlik va Shayxa Fotima bint Muborak ta’lim markazi faoliyatini muhokama qilgan.
Sergey Kravtsovning ta’kidlashicha, Rossiyada uch yildan buyon arab tili bo‘yicha olimpiada o‘tkazib kelinmoqda. Shuningdek, markaz faoliyati doirasida rus xalq ertaklari, Rossiya haqidagi kitoblar va rus adiblarining asarlari arab tiliga tarjima qilingan hamda BAAga taqdim etilgan.
Rossiya Ta’lim vazirligi qayd etishicha, mazkur tashabbus ikki mamlakat o‘rtasidagi ta’lim hamkorligini kengaytirish, rus va arab tillarini rivojlantirish hamda madaniyatlararo muloqotni mustahkamlashga xizmat qiladi.
