Shavkat Mirziyoyev Ozarbayjon elchisini qabul qildi
Diplomatik missiyasini yakunlayotgan Guseyn Guliyev O‘zbekiston va Ozarbayjon hamkorligiga qo‘shgan hissasi uchun “Mehnat shuhrati” ordeni bilan taqdirlandi.
Shavkat Mirziyoyev 22-iyun kuni O'zbekistonda diplomatik missiyasini yakunlayotgan Ozarbayjonning Favqulodda va Muxtor elchisi Guseyn Guliyevni qabul qildi.
Uchrashuvda davlat rahbari elchining O‘zbekistondagi samarali faoliyati hamda ikki mamlakat o‘rtasidagi strategik sheriklik va ittifoqchilik munosabatlarini rivojlantirish va mustahkamlashga qo‘shgan shaxsiy hissasini alohida e’tirof etdi.
Qayd etilganidek, so‘nggi yillarda O‘zbekiston va Ozarbayjon o‘rtasidagi hamkorlik yangi bosqichga ko‘tarildi. Oliy va boshqa darajalarda muntazam muloqotlar yo‘lga qo‘yilib, savdo-iqtisodiy aloqalar sezilarli darajada faollashdi. O‘zaro tovar ayirboshlash hajmi bir necha barobar oshdi, Ozarbayjon kapitali ishtirokida 280 ta korxona tashkil etildi hamda Qo‘shma investitsiya kompaniyasi faoliyati yo‘lga qo‘yildi.
Shuningdek, geologiya, qishloq xo‘jaligi, transport, shaharsozlik, to‘qimachilik, farmatsevtika va boshqa yo‘nalishlardagi kooperatsiya loyihalari amaliy bosqichga kirgani ta’kidlandi. Madaniy-gumanitar sohada ham qator qo‘shma dasturlar muvaffaqiyatli amalga oshirilmoqda.
Uchrashuv yakunida Prezident Shavkat Mirziyoyev O‘zbekiston va Ozarbayjon o‘rtasidagi ko‘p qirrali munosabatlarni mustahkamlashga qo‘shgan munosib hissasi uchun elchi Guseyn Guliyevni “Mehnat shuhrati” ordeni bilan taqdirladi.
Ozarbayjon elchisi, o‘z navbatida, diplomatik missiyasiga berilgan yuksak baho hamda ikki mamlakat o‘rtasidagi keng ko‘lamli hamkorlikni rivojlantirishga qaratilgan doimiy qo‘llab-quvvatlov uchun O‘zbekiston rahbariga samimiy minnatdorlik bildirdi.
