AQSh Eron neftiga nisbatan sanksiyalarni 60 kunga bekor qildi

 

AQSh Moliya vazirligi Eron nefti, neft-kimyo mahsulotlari va neft mahsulotlari bilan bog‘liq ayrim operatsiyalar uchun 60 kunlik vaqtinchalik umumiy litsenziya berdi. Qaror Shveytsariyaning Byurgenstok shahrida AQSh va Eron o‘rtasida o‘tkazilgan muzokaralardan so‘ng qabul qilingan.

 

AQSh moliya vaziri Skott Bessent ma’lum qilishicha, berilgan litsenziya 2026-yil 21-avgustga qadar amal qiladi. Unga ko‘ra, Eron nefti, neft-kimyo mahsulotlari va neft mahsulotlarini ishlab chiqarish, yetkazib berish hamda sotish bilan bog‘liq ayrim operatsiyalarni amalga oshirishga ruxsat beriladi.

 

Shuningdek, hujjat AQSh sanksiyalariga duchor bo‘lgan ayrim kemalar bilan bog‘liq bitimlarni ham qamrab oladi. To‘lovlarni AQSh dollarida, jumladan Eron hukumati yoki sanksiyalangan ayrim subyektlar foydasiga amalga oshirish imkoniyati nazarda tutilgan.

 

Biroq litsenziya Shimoliy Koreya, Kuba va Rossiya nazorati ostidagi Ukraina hududlarida yashovchi shaxslar ishtirokidagi bitimlarga tatbiq etilmaydi hamda boshqa amaldagi cheklovlarni bekor qilmaydi.

 

Skott Bessentning ta’kidlashicha, mazkur qaror muzokaralar davomida erishilgan kelishuvlar doirasida qabul qilingan. Uning qayd etishicha, Tehron Hormuz bo‘g‘ozi orqali erkin kemalar qatnovini ta’minlash va MAGATE inspektorlarining mamlakatga kirishiga ruxsat berish bo‘yicha majburiyatlarni o‘z zimmasiga olgan.

 

Biroq AQSh va Eron o‘rtasidagi muloqotda vositachilik qilgan Qatar va Pokiston tomonidan e’lon qilingan qo‘shma bayonotda MAGATE inspektorlarining qaytishi yoki Hormuz bo‘g‘ozining ochilishi bo‘yicha aniq majburiyatlar tilga olinmagan.