Namangan aeroportida 175 million dollarlik loyiha amalga oshirilmoqda

 

Shavkat Mirziyoyevning Namangan viloyatiga tashrifi boshlandi. Davlat rahbari tashrif doirasida Namangan xalqaro aeroportida barpo etilayotgan yangi yo‘lovchi terminali qurilishi bilan tanishdi. Bu haqda Prezident matbuot xizmati xabar berdi.

 

Mazkur loyiha Prezidentning 2021-yil 29-martdagi “Respublika aeroportlarini boshqarish sohasida davlat-xususiy sheriklikni rivojlantirish chora-tadbirlari to‘g‘risida”gi qarori asosida amalga oshirilmoqda.

 

Namangan xalqaro aeroporti 1971-yilda foydalanishga topshirilgan bo‘lib, 2013-yildan boshlab xalqaro maqomda faoliyat yuritib kelmoqda. Bugungi kunda aeroport orqali 9 ta aviakompaniya muntazam parvozlarni amalga oshirmoqda.

 

Loyiha doirasida jami 175 million dollar investitsiya jalb qilingan. Rejaga ko‘ra, 2026-yil yakuniga qadar zamonaviy talablarga javob beradigan yangi yo‘lovchi terminali foydalanishga topshiriladi. Umumiy maydoni 22,6 ming kvadrat metrni tashkil etuvchi uch qavatli terminal soatiga 1,2 ming nafardan ortiq, yiliga esa 3 milliondan ziyod yo‘lovchiga xizmat ko‘rsatish imkoniyatiga ega bo‘ladi.

 

Yangi terminalda chegara va bojxona nazorati punktlari, viza xizmatlari, biznes-zal, savdo va umumiy ovqatlanish shoxobchalari, tibbiyot punkti hamda Duty Free hududi tashkil etilishi rejalashtirilgan. Loyiha natijasida 550 ta yangi ish o‘rni yaratiladi.

 

Shuningdek, 2027-yil yakuniga qadar kunlik quvvati 50 tonna bo‘lgan kargo terminalini ishga tushirish rejalashtirilgan. Bu esa Farg‘ona vodiysi uchun yagona zamonaviy kargo tizimini shakllantirib, mahsulotlarni dunyoning 90 dan ortiq mamlakatiga eksport qilish imkoniyatini kengaytiradi.

 

Davlat rahbari qurilish jarayonlari bilan tanishar ekan, aeroport infratuzilmasini yanada takomillashtirish bo‘yicha mutasaddilarga tegishli topshiriqlar berdi.