Biz uchun maqom hamma narsa — Ozodbek Nazarbekov
Madaniyat vaziri maqom san’ati o‘zbek xalqining ma’naviy merosi va milliy o‘zligini namoyon etuvchi muhim qadriyat ekanini ta’kidladi.
Namanganda o'tkazilayotgan Xalqaro maqom san’ati anjumani doirasida OAV vakillariga intervyu bergan Madaniyat vaziri maqom san’atini o‘zbek xalqining ma’naviy va madaniy boyligi sifatida ta’rifladi. Bu haqda Zamon.uz muxbiri xabar bermoqda.
Ozodbek Nazarbekovning ta’kidlashicha, maqom o‘zida tarbiya, ma’rifat, tarix va insoniy qadriyatlarni mujassam etgan bo‘lib, millatning dunyodagi hech kimga o‘xshamaydigan qirralarini namoyon etadi. U maqomni ilmiy asoslari mustahkam, chuqur o‘rganishni talab qiladigan mukammal san’at turi ekanini qayd etdi.
"Biz uchun maqom hamma narsa. Biz o‘zbek xalqi uchun maqom aynan hamma narsa. Bu aynan tarbiya, bu ma’rifat, bu insoniylik, bu ezgulik, bu yaxshilik. Ilm hamma narsa bor. Maqom ichida hamma narsa bor. Tariximiz ham bor va eng muhimi, millatimizning shakli bor. Maqom maqomimizda aynan bizning hech kimga o‘xshamagan qirramizni aynan maqomda ko‘rsatishimiz mumkin", dedi vazir.
Shuningdek, vazir yoshlar orasida maqomga qiziqishni yanada oshirish zarurligini ta’kidlab, bu merosni asrab-avaylash va kelajak avlodga to‘liq yetkazish muhimligini bildirdi.
