Malayziyada 3 nafar o‘zbekistonlik o‘limga hukm qilindi
Ular o‘zlari bilmagan holda narkokuryerlik qilgan. Mamlakatga sayohat uchun borgan ayollarning chemodanidan sintetik narkotiklar topilgan.
Malayziyada bir necha yil avval giyohvand moddalar kontrabandasi bilan bog‘liq jinoyatda ayblangan uch nafar O‘zbekiston fuqarosi o‘lim jazosiga hukm qilingan. Bu haqda Davlat xavfsizlik xizmatining iste’fodagi xodimi O‘ktam Suvonov ma’lum qildi.
Uning so‘zlariga ko‘ra, 56 va 54 yoshli ikki ayol hamda ularning bir tanishi Kuala-Lumpur aeroportida yirik miqdordagi giyohvand moddalar bilan qo‘lga olingan. Keyinchalik Malayziya sudi ularga nisbatan o‘lim jazosi tayinlagan.
Suvonovning aytishicha, voqea ayollardan birining qizi chet el fuqarosiga turmushga chiqqach, onasini Malayziyaga bepul sayohatga taklif qilishi bilan boshlangan. Ayol safarga uzoq yillardan buyon nogiron qizini parvarishlab kelayotgan qo‘shnisi va yana bir tanishini ham taklif qilgan.
Ma’lum qilinishicha, parvoz oldidan notanish shaxs ularga bo‘sh chemodanlarni topshirgan. Kuala-Lumpurga yetib borganlarida esa ularni hech kim kutib olmagan. Shundan so‘ng aeroport xavfsizlik xizmati xodimlari tomonidan tekshiruv o‘tkazilgan.
Tekshiruv davomida har bir chemodandan to‘rt kilogrammdan metamfetamin aniqlangan. Suvonovning ta’kidlashicha, ayollar o‘zlari bilmagan holda narkokuryer sifatida foydalanilgan bo‘lishi mumkin.
Iste’fodagi DXX xodimi keyinchalik Malayziyaga borib, qamoqxonada ayollar bilan uchrashganini ham aytdi. Uning so‘zlariga ko‘ra, mahkumalardan biri uchrashuv chog‘ida:
“Siz, ehtimol, hayotimda ko‘rib turgan eng so‘nggi vatandoshimsiz”, degan.
O‘ktam Suvonov mazkur ish bo‘yicha chiqarilgan o‘lim jazosi ijro etilgan yoki etilmagani haqida ma’lumot bermadi.
