Mehnat inspeksiyasi Samarqand viloyati hokimiga ogohlantirish yubordi
Inspeksiya o‘qituvchilarni ko‘chalar monitoringiga majburiy jalb etish majburiy mehnat holati sifatida baholanishi mumkinligini ma’lum qildi.
Mehnat inspeksiyasi Samarqand viloyati hokimi Adiz Boboyevga pedagog xodimlarni kasbiy faoliyatiga aloqador bo‘lmagan ishlarga jalb etish masalasida ogohlantirish yubordi.
Mehnat inspeksiyasi amaldagi qonunchilikka ko‘ra pedagog xodimlarni ularning kasbiy faoliyati bilan bog‘liq bo‘lmagan ishlarga majburiy tarzda jalb etish taqiqlanishini eslatgan. Qayd etilishicha, mazkur tashabbus amaliyotga joriy etilib, pedagoglar o‘z faoliyatiga daxldor bo‘lmagan vazifalarni bajarishga majbur qilinsa, bu majburiy mehnat holatlarining yuzaga kelishiga sabab bo‘lishi mumkin.
Shu munosabat bilan Samarqand viloyati hokimiga pedagoglarni kasbiy faoliyatiga aloqador bo‘lmagan ishlarga jalb etish qonunchilikka zid ekani hamda bunday holatlar uchun javobgarlik belgilanganligi yuzasidan rasmiy ogohlantirish yuborilgan.
Inspeksiya har qanday tashabbusni amalga oshirishda amaldagi qonunchilik talablariga qat’iy rioya etish, shuningdek, pedagoglarning huquq va qonuniy manfaatlarini himoya qilish zarurligini ta’kidlagan.
Eslatib o‘tamiz, avvalroq Samarqand viloyati hokimi Adiz Boboyev oliy ta’lim muassasalari rahbarlari bilan uchrashuvda ko‘chalarning tozaligi, daraxtlar holati va infratuzilma bilan bog‘liq masalalarni monitoring qilish bo‘yicha ayrim ko‘chalarni oliy ta’lim muassasalariga biriktirish tashabbusini ilgari surgani haqida xabar berilgan edi.
