AQSh Eronga yana havo zarbalari berdi
Eron ham Quvayt va Bahrayndagi AQSh harbiy obyektlariga raketa hamda dron hujumlari uyushtirilganini bildirdi.
AQSh harbiylari Eronning harbiy kuzatuv infratuzilmasi, aloqa tizimlari, havo mudofaasi obyektlari, dron omborlari hamda mina qo‘yish uskunalariga navbatdagi havo zarbalarini amalga oshirdi. Bu haqda AQSh Markaziy qo‘mondonligi (CENTCOM) ma’lum qildi.
Qayd etilishicha, mazkur zarbalar Eron tomonidan Hormuz bo‘g‘ozi yaqinida harakatlangan tijorat kemalariga uyushtirilgan hujumlarga javob tariqasida amalga oshirilgan.
CENTCOM ma’lumotiga ko‘ra, avvalgi zarbalardan so‘ng Tehronga sulh shartlariga rioya qilish imkoniyati berilgan. Biroq Eron kuchlari Panama bayrog‘i ostida suzayotgan va bortida ikki million barreldan ortiq xom neft bo‘lgan "Kiku" tankeriga kamikadze droni orqali hujum uyushtirgan.
AQSh harbiylari Hormuz bo‘g‘ozi orqali tijorat kemalari harakati davom etayotganini bildirib, mintaqadagi kuchlar har qanday tahdidga javob berishga tayyorligini ta’kidlagan.
Shu bilan birga, Eron tomonidan Quvayt va Bahrayndagi AQSh harbiy obyektlariga raketa va dron hujumlari uyushtirilgani ma’lum qilindi. Eron Islom inqilobi qo‘riqchilari korpusi (IIPK) ushbu hujumlar uchun javobgarlikni o‘z zimmasiga olib, ularni AQShning avvalgi zarbalariga javob sifatida izohlagan.
Voqealardan so‘ng AQSh prezidenti Donald Tramp sulh bitimi buzilganini ta’kidlab, zarurat tug‘ilganda Eronga qarshi yangi harbiy amaliyotlar o‘tkazilishi mumkinligini bildirgan.
