1-iyuldan O‘zbekistonda kasallik nafaqalarini to‘lashning yangi tartibi joriy etiladi

Ijtimoiy himoya milliy agentligi hamda Ijtimoiy sug‘urta jamg‘armasi tomonidan brifing o‘tkazildi. Brifingda ma’lum qilinishicha, 2026-yil 1-iyuldan boshlab joriy etiladigan yangi tartib doirasida bolalarni parvarish qilish bo‘yicha qo‘shimcha ijtimoiy kafolatlar ham joriy etiladi.

 

Xususan, 14 yoshgacha bo‘lgan bolani parvarish qilish uchun qo‘shimcha 20 kalendar kungacha, nogironligi bo‘lgan 16 yoshgacha bolani parvarish qilish uchun esa qo‘shimcha 40 kalendar kungacha kasallik nafaqasi to‘lanadi. 

 

Brifingda ta’kidlanishicha, yangi tizimning eng muhim jihatlaridan biri barcha jarayonlarning to‘liq avtomatlashtirilishidir. Endilikda fuqarolardan kasallik nafaqasini olish uchun ariza yoki qo‘shimcha hujjatlar talab etilmaydi. 

 

Elektron mehnatga layoqatsizlik varaqasi rasmiylashtirilishi bilan tizim fuqaroning rasmiy bandligi, sug‘urta staji hamda daromadi haqidagi ma’lumotlarni avtomatik ravishda tekshiradi va nafaqani proaktiv tarzda tayinlaydi. 

 

Kasallik nafaqalari “Baraka” tizimi orqali to‘lanadi. Har bir fuqaro uchun virtual karta avtomatik ravishda ochilib, mablag‘lar ushbu karta orqali o‘tkaziladi.

 

Shuningdek, kasallik nafaqalarini moliyalashtirish muddatlari ham aniq belgilangan. Oyning 1–15-sanalari oralig‘ida tayinlangan nafaqalar shu oyning 25-sanasiga qadar, 16–31-sanalari oralig‘ida tayinlangan nafaqalar esa keyingi oyning 10-sanasigacha fuqarolarga to‘lab beriladi. 

 

Mutasaddilarning ta’kidlashicha, yangi tartib fuqarolar uchun xizmatlarni soddalashtirish, nafaqalarni o‘z vaqtida yetkazish hamda davlat ijtimoiy sug‘urtasi tizimining samaradorligini yanada oshirishga xizmat qiladi.