Rossiyaning Ukrainaga hujumlari oqibatida sakkiz kishi halok bo‘ldi
Zelenskiy hujumlarni “dahshatli” deb baholab, Ukrainaning ittifoqchilarini mamlakat havo mudofaasini kuchaytirishga chaqirdi.
Rossiyaning Ukraina hududiga uyushtirgan navbatdagi raketa va dron hujumlari oqibatida kamida sakkiz kishi halok bo‘ldi, 34 kishi jarohatlandi. Bu haqda Ukraina rasmiylariga tayanib Al Jazeera xabar berdi.
Prezident Volodimir Zelenskiyga ko‘ra, Dnipro shahriga berilgan raketa zarbasi oqibatida besh kishi, jumladan 13 yoshli qiz halok bo‘lgan. Yana 28 kishi turli darajadagi tan jarohatlari olgan.
Jarohatlanganlarda bosh miya shikastlari, o‘q-parcha jarohatlari, suyak sinishlari va portlash oqibatidagi travmalar qayd etilgan.
Zaporijjya shahriga uyushtirilgan dron hujumi oqibatida esa yana uch kishi halok bo‘lgan, olti kishi, jumladan bir bola jarohat olgan. Zelenskiy, shuningdek, Rossiya Sumi, Odesa, Chernigov, Xerson va Xarkiv viloyatlariga ham zarbalar berganini bildirdi.
Ukraina prezidenti hujumlarni “dahshatli” deb baholab, xalqaro hamjamiyatni mamlakatning havo mudofaa tizimini yanada kuchaytirishga chaqirdi.
Ayni paytda Kreml Rossiyaning tinchlik bo‘yicha pozitsiyasi o‘zgarmaganini ma’lum qildi. Moskva 2024-yilda ilgari surilgan talablar, jumladan Ukraina qo‘shinlarining Rossiya o‘z hududi deb hisoblaydigan to‘rtta viloyatdan chiqib ketishi hamda Kiyevning NATOga qo‘shilish rejasidan voz kechishi zarurligini yana bir bor ta’kidladi.
Rossiya prezidenti Vladimir Putin so‘nggi intervyusida ushbu hududlarni to‘liq nazorat qilish maqsadidan voz kechmasligini aytdi. Uning ta’kidlashicha, Ukraina uzoq masofali zarbalarni o‘zaro to‘xtatish va jangovar harakatlarni Donetsk, Lugansk, Xerson hamda Zaporijjya viloyatlari bilan cheklashni taklif qilgan, biroq Moskva bu tashabbusni qabul qilmagan.
