Qashqadaryoda voyaga yetmagan qiz to‘rt erkak tomonidan zo‘rlangani aytilmoqda
Ijtimoiy himoya milliy agentligi holat nazoratga olinganini bildirib, jabrlanuvchiga psixologik, onasiga esa yuridik yordam ko‘rsatilganini ma'lum qildi.
IIV matbuot kotibi Shohrux G‘iyosov Qashqadaryo viloyatida voyaga yetmagan qiz to‘rt erkak tomonidan zo‘rlanganini tasdiqladi, deya xabar bermoqda Nemolchi.uz.
Ma’lum qilinishicha, 2026-yil 7 iyun kuni Qashqadaryo viloyatining Yakkabog‘ tumanida Sh.X. (23 yosh), D.X. (22), O.N. (20) va D.A. (21) 14 yoshli qizni Damas rusumli avtomashinaga mindirib, dalaga olib borib, zo‘rlagan.
Yakkabog‘ tumani IIB huzuridagi tergov-tezkor guruhi voqea joyini ko‘zdan kechirib, ish uchun ahamiyatli bo‘lgan ashyo va dalillarni olgan. Sudga oid tibbiy, biologik va psixologik ekspertizalar tayinlangan.
8-iyun kuni holat yuzasidan Jinoyat kodeksining 128-moddasi 1-qismi bilan jinoyat ishi qo‘zg‘atilgan. 29-iyun kuni esa ish Jinoyat kodeksining 118-moddasi 3-qismi "a" bandiga qayta malakalanib, gumonlanuvchilarga ayblov e’lon qilingan va ular protsessual tartibda ushlangan.
Qayd etilishicha, mazkur jinoyat ishi Tergov departamenti tomonidan nazoratga olingan bo‘lib, dastlabki tergov yakuni bo‘yicha barcha aybdor shaxslarga qonuniy chora ko‘rilishi ta’minlanadi.
Shuningdek, Ijtimoiy himoya milliy agentligi mazkur holatni nazoratga olganini ma’lum qildi. Agentlikka ko‘ra, jabrlanuvchiga psixologik, uning onasiga esa yuridik yordam ko‘rsatilgan.
Jabrlanuvchi bilan ishlash maqsadida mahalladagi ijtimoiy xodim hamda Yakkabog‘ tumani “Inson” ijtimoiy xizmatlari markazi Bolalarni ijtimoiy himoya qilish bo‘limi mutaxassislari tomonidan individual ijtimoiy kuzatuv ("keys") ochilib, dastlabki baholash ishlari o‘tkazilgan.
