Qoraqalpog‘istonda bank xodimlari va hokim yordamchilari 1,4 mlrd so‘mlik imtiyozli kreditlarni o‘zlashtirdi
Ular 37 nafar fuqaroning nomiga kredit rasmiylashtirib, pul mablag‘larini talon-toroj qilgan.
Qoraqalpog‘iston Respublikasining Beruniy tumanida imtiyozli kredit mablag‘larini o‘zlashtirish bilan bog‘liq holat fosh etildi. Bu haqda Bosh prokuratura huzuridagi Departament xabar berdi.
Ma’lum qilinishicha, Departamentning Beruniy tumani bo‘limi tomonidan o‘tkazilgan tergovga qadar tekshiruvda tijorat bankining bank xizmatlari markazi mas’ul xodimlari, 7 ta mahalladagi hokim yordamchilari hamda boshqa shaxslar o‘zaro til biriktirgani aniqlangan.
Ular 37 nafar fuqaro nomiga jami 1,4 milliard so‘m miqdorida imtiyozli kredit ajratilishiga erishib, ushbu mablag‘larni o‘zlashtirish yo‘li bilan talon-toroj qilgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.
