Toshkentda Hindistondan pochta orqali yuborilgan kuchli ta’sir qiluvchi dorilar to‘xtatib qolindi
Jo‘natma ichida tarkibida jami 1,8 kilogramm “Pregabalin” kuchli ta’sir qiluvchi moddasi mavjud bo‘lgan 6 ming dona kapsula borligi aniqlandi.
Toshkentdagi pochta bo‘limida Hindistondan yuborilgan jo‘natma ichidan 6 ming dona “Pregabalin” kapsulasi aniqlandi. Bu haqda DXX xabar berdi.
Ma'lum qilinishicha, Toshkent shahrining Yunusobod tumanidagi pochta bo‘limida Toshkent viloyatining Toshkent tumanida yashovchi, 1994-yilda tug‘ilgan shaxs Hindistondan yuborilgan pochta jo‘natmasini qabul qilib olgan vaqtida to‘xtatilib, belgilangan tartibda tekshirilgan.
Tekshiruv davomida jo‘natma ichida tarkibida jami 1,8 kilogramm “Pregabalin” kuchli ta’sir qiluvchi moddasi mavjud bo‘lgan 6 ming dona kapsula borligi aniqlangan.
Mazkur holat yuzasidan fuqaroga nisbatan Jinoyat kodeksining 246-moddasi 1-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
