Afg‘onistondan dron yordamida narkotik modda olib o‘tishga urinish to‘xtatildi
Tezkor tadbir davomida 2 kilogramm 32 gramm opiy musodara qilindi.
Davlat xavfsizlik xizmati ma’lumotiga ko‘ra, DXXning Surxondaryo viloyati bo‘yicha boshqarmasi, Chegara qo‘shinlari hamda Ichki ishlar organlari xodimlari hamkorligida o‘tkazilgan tezkor tadbir davomida narkotik moddalar kontrabandasiga chek qo‘yildi.
Aniqlanishicha, Afg‘oniston hududidagi noma’lum shaxslar Amudaryo orqali giyohvandlik vositalarini dron yordamida O‘zbekiston hududiga olib o‘tishga uringan.
Tezkor choralar natijasida noqonuniy urinish o‘z vaqtida bartaraf etilib, uchuvchisiz uchish apparatiga mahkamlangan 2 kilogramm 32 gramm opiy ashyoviy dalil sifatida musodara qilindi.
Mazkur holat yuzasidan jinoyat ishi qo‘zg‘atilgan. Hozirda tergov harakatlari olib borilmoqda.
