Kanada va Koreyaga yuborish bilan bog‘liq firibgarlik holatlari aniqlandi
Gumonlanuvchilar ishga va o‘qishga yuborishni va’da qilib, fuqarolardan minglab AQSh dollarini firibgarlik yo‘li bilan qo‘lga kiritgan.
O‘zbekistonda fuqarolarni Janubiy Koreyaga ishga va o‘qishga yuborishni, shuningdek, viza va hujjatlarni rasmiylashtirib berishni va’da qilgan bir necha shaxslarning firibgarlik holatlari fosh etildi.
Bosh prokuratura huzuridagi Departamentning Toshkent viloyati boshqarmasi tomonidan o‘tkazilgan tergovga qadar tekshiruvda muqaddam sudlangan fuqaro M.A. ikki nafar fuqaroni Janubiy Koreyaga ishga yuborishni va’da qilib, ulardan 12 ming AQSh dollarini firibgarlik yo‘li bilan olgani aniqlandi.
Shuningdek, Departamentning Quvasoy shahar bo‘limi tomonidan o‘tkazilgan tekshiruvda fuqaro D.R. bir fuqaroni Janubiy Koreyadagi oliy ta’lim muassasasiga o‘qishga kiritish va viza olib berishni va’da qilib, 11 ming AQSh dollarini qo‘lga kiritgani ma’lum bo‘ldi. Mazkur mablag‘ning 200 AQSh dollari protsessual tartibda qaytarilgani rasmiylashtirilgan.
Yana bir holatda, Departamentning Paxtaobod tumani bo‘limi tomonidan o‘tkazilgan tekshiruv davomida muqaddam sudlangan fuqaro X.M. ikki nafar fuqaroga Kanada va Janubiy Koreyaga ketish uchun hujjatlarni tayyorlab berishni va’da qilib, jami 4 945 AQSh dollarini firibgarlik yo‘li bilan olgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari davom ettirilmoqda.
