Qamchibek Tashiyev hukmdan bir kun o‘tmay futbol uchrashuvida ko‘rinish berdi
Tashiyev hokimiyatni kuch bilan egallashga urinishda aybdor deb topilgandi.
Qirg‘iziston Milliy xavfsizlik davlat qo‘mitasining sobiq raisi Qamchibek Tashiyev 3-iyul kuni Manas shahridagi “Kurmanbek” stadionida bo‘lib o‘tgan Qirg‘iziston Premyer-ligasi uchrashuvini tomosha qildi. Bu haqda 24.kg xabar berdi.
Ma’lum qilinishicha, tarqalgan kadrlarda Tashiyevning VIP tribunaga kirib borayotgani aks etgan. Mazkur uchrashuvda “Muras Yunayted” va “Aziyagol” jamoalari o‘zaro bahslashib, o‘yin 1:1 hisobidagi durang bilan yakunlangan.
Eslatib o‘tamiz, 2-iyul kuni Bishkekning Birinchi may tuman sudi “75 lar xati” deb nomlangan jinoyat ishi bo‘yicha hukm chiqargan edi. Sud Tashiyevni hokimiyatni kuch bilan egallashga urinish aybi bilan to‘rt yil muddatga ozodlikdan mahrum qilish va mol-mulkini musodara etishga hukm qildi.
Shu bilan birga, sud unga uch yil muddatga probatsiya nazoratini qo‘llagani sababli u ozodlikdan mahrum etish jazosini amalda o‘tamaydi.
Lavozim vakolatini suiiste’mol qilish ayblovi bo‘yicha esa Tashiyev oqlandi. Uning advokati hukm ustidan apellyatsiya shikoyati berilishini ma’lum qilgan.
