Jizzaxda 100 ming so‘m pora olgan PPX inspektoriga 20,6 mln so‘m jarima tayinlandi
U ikki yil muddatga IIOda mansabdorlik va moddiy javobgarlik bilan bog‘liq lavozimlarda ishlash huquqidan mahrum qilindi.
Jizzax viloyatining Forish tumanida haydovchidan 100 ming so‘m pora olgan patrul-post xizmati inspektori sud hukmi bilan jarimaga tortildi. Bu haqda “Daryo” xabar berdi.
Ma’lum bo‘lishicha, B.X. Jizzax viloyati IIB Jamoat tartibini saqlash boshqarmasi patrul-post xizmati batalyonida inspektor lavozimida ishlagan. U Jizzax shahridagi "Eski shahar buyum bozori" hududi oldida xizmat olib borayotgan vaqtda taqiqlangan joyda to‘xtagan Changan rusumli mikroavtobusni to‘xtatib, haydovchiga ma’muriy bayonnoma rasmiylashtirilishi, avtomobil jarima maydonchasiga olib ketilishi va buning oqibatida 1 million so‘mdan ortiq jarima hamda boshqa xarajatlar yuzaga kelishini bildirgan.
Haydovchi oilaviy sharoitini vaj qilib, uni ogohlantirish bilan qo‘yib yuborishni so‘ragan. Shundan so‘ng inspektor avval 1 million so‘m, keyin esa 100 ming so‘m evaziga masalani hal qilishni taklif qilgan. Haydovchi so‘ralgan mablag‘ni inspektor ko‘rsatgan bank kartasiga o‘tkazib bergan.
Haydovchi shu kunning o‘zida ichki ishlar organlariga murojaat qilgan. Xizmat tekshiruvi yakuniga ko‘ra, inspektor egallab turgan lavozimidan bo‘shatilgan.
Jinoyat ishlari bo‘yicha Forish tumani sudi B.X.ni Jinoyat kodeksining 210-moddasi 1-qismi (pora olish) bilan aybdor deb topdi. Unga bazaviy hisoblash miqdorining 50 baravari — 20,6 million so‘m miqdorida jarima jazosi tayinlandi.
Shuningdek, sud hukmi bilan B.X. ikki yil muddatga ichki ishlar organlarida mansabdorlik va moddiy javobgarlik bilan bog‘liq lavozimlarda ishlash huquqidan mahrum qilindi.
