“Hududiy elektr tarmoqlari” Andijon filialining 12 nafar xodimiga nisbatan jinoyat ishi ochildi
Filialda elektr hisoblagichlari bilan bog‘liq qonunbuzarliklar aniqlanib, xodimlarga qamoqqa olish ehtiyot chorasi qo‘llanildi.
“Hududiy elektr tarmoqlari” AJ Andijon va Samarqand filiallarida elektr energiyasi hisoblagichlarini iste’molchilarga o‘rnatish jarayonlari yuzasidan xizmat tekshiruvlari o‘tkazilayotganini ma’lum qildi.
Xabarga ko‘ra, Ichki audit xizmati hamda Komplayens nazorati xizmati tomonidan olib borilgan o‘rganishlar davomida Andijon hududiy filialida elektr hisoblagichlarini o‘rnatish jarayonida qonunchilik talablarining buzilgani va hisoblagichlar kamomadi aniqlangan.
Mazkur holatlar yuzasidan huquqni muhofaza qiluvchi organlarga xabar berilgan. Natijada qonunbuzarlik sodir etganlikda gumon qilinayotgan filialning 12 nafar xodimiga nisbatan jinoyat ishi qo‘zg‘atilib, qamoqqa olish ehtiyot chorasi qo‘llanilgan. Hozirda jamiyatga yetkazilgan zararni undirish bo‘yicha choralar ko‘rilmoqda.
Shuningdek, tekshiruvlar davomida Samarqand shahrida elektr hisoblagichlari jamiyat mablag‘lari hisobidan iste’molchilarga noqonuniy ravishda o‘rnatilgani ham aniqlangan. Ushbu holat yuzasidan ham huquqni muhofaza qiluvchi organlarga murojaat qilingan.
“Hududiy elektr tarmoqlari” AJ ma’lum qilishicha, Samarqand viloyatining boshqa shahar va tumanlarida ham elektr hisoblagichlarini o‘rnatish jarayonlari yuzasidan o‘rganishlar davom ettirilmoqda.
