AQSh Erondagi qizlar maktabiga eskirgan razvedka ma’lumotlari asosida zarba bergan — CNN
Ma’lumotlarga ko‘ra, Pentagon nishonlar bo‘yicha ogohlantirishlarni e’tiborsiz qoldirgan.
AQSh harbiy qo‘mondonligi Erondagi ayrim nishonlarga zarba berishda eskirgan razvedka ma’lumotlariga tayangan. Bu haqda CNN telekanali o‘z manbalariga tayanib xabar berdi.
Ma’lum qilinishicha, fevral oyida Minob shahridagi qizlar maktabi ham kiritilgan nishonlar ro‘yxati tasdiqlangan. Biroq zarbalarni rejalashtirish tizimlarida ushbu ma’lumotlar 10 yildan ortiq avval yig‘ilgani va ularni qayta tekshirish zarurligi haqida ogohlantirishlar bo‘lgan.
CNN manbalariga ko‘ra, ushbu ogohlantirishlarga qaramay, harbiy qo‘mondonlik nishonlarni zarba beriladigan obyektlar ro‘yxatidan chiqarmagan. Telekanalning qayd etishicha, AQSh harbiylari hujumdan bir necha kun o‘tib hodisa sabablarini aniqlagan bo‘lsa-da, tergov natijalari hozirgacha rasman e’lon qilinmagan.
Eron rasmiylari 28-fevral kuni AQSh va Isroil tomonidan Minobdagi qizlar boshlang‘ich maktabiga havo hujumi uyushtirilganini ma’lum qilgan. Ularning bildirishicha, hodisa oqibatida 168 nafar o‘quvchi, 14 nafar o‘qituvchi va maktab xodimi halok bo‘lgan, yana o‘nlab fuqarolar jarohat olgan.
CNN shuningdek, Pentagonning eski razvedka bazalariga tayanishi hamda so‘nggi yillardagi kadrlar qisqarishi razvedka ma’lumotlarini tahlil qilish sifatiga salbiy ta’sir ko‘rsatgan bo‘lishi mumkinligini ta’kidlagan.
