Eron juda tez orada mag‘lub bo‘ladi — Tramp
AQSh prezidenti Eron bilan mojaroda g‘alaba yaqin ekanini ta’kidladi.
AQSh prezidenti Donald Tramp Eron bilan davom etayotgan keskinlik fonida mamlakati ushbu mojaroda tez orada ustunlikka erishishini ma’lum qildi.
Pensilvaniya shtatida o‘tkazilgan mudofaa forumida so‘zga chiqqan Tramp: “Biz tez orada Eronni mag‘lub etamiz. Ular juda tez orada mag‘lub bo‘lishadi”, — degan.
So‘nggi haftalarda AQSh va Eron o‘rtasidagi harbiy qarama-qarshilik keskinlashgan. AQSh harbiylari 8-iyuldan buyon Erondagi bir qator nishonlarga zarbalar berganini ma’lum qilgan. AQSh Markaziy qo‘mondonligi bu hujumlarni Eronning Hormuz bo‘g‘ozi orqali harakatlanayotgan tijorat kemalariga qarshi harakatlariga javob sifatida izohlagan.
Bunga javoban Eron Yaqin Sharqdagi ayrim AQSh harbiy bazalariga zarbalar berganini bildirgan.
12-iyul kuni Eron AQShning mintaqadagi harbiy aralashuvi to‘xtamaguncha Hormuz bo‘g‘ozini yopishini e’lon qilgan edi. Shundan so‘ng Tramp Eronga nisbatan “to‘liq dengiz blokadasi” joriy etilganini ma’lum qilib, bu Eron portlariga yo‘l olgan yoki u yerdan chiqayotgan, shuningdek Eron yuklarini tashiyotgan barcha kemalarga taalluqli bo‘lishini bildirgan.
Shuningdek, Tramp avvalroq Eronga “o‘zini yaxshi tutishni” tavsiya qilgan va hozircha Tehron bilan muzokaralarni qayta boshlash uchun hech qanday muddat belgilash niyatida emasligini ta’kidlagan.
