Toshkent–Nurafshon yo‘lining bir qismi 21 iyulgacha yopiladi

Toshkent va Nurafshon shaharlarini bog‘lovchi D-002 avtomobil yo‘lining bir qismida transport vositalari harakati vaqtincha to‘xtatiladi.

 

Ma’lum qilinishicha, Toshkent viloyati hokimining tegishli farmoyishiga asosan yo‘l infratuzilmasini qurish ishlarini yakunlash, harakat xavfsizligini ta’minlash va tirbandliklarning oldini olish maqsadida 21 iyulgacha D-002 avtomobil yo‘lining 4-kilometridan 9-kilometrigacha bo‘lgan qismida barcha transport vositalari harakati to‘liq cheklanadi.

 

Cheklov yangi qurilayotgan ko‘prikdan boshlanib, O‘rta Chirchiq tumanidagi Avangard aholi yashash hududigacha bo‘lgan masofani qamrab oladi.

 

Shu munosabat bilan Bekobod shahri va tumani hamda Bo‘ka tumanidan Toshkent tomon harakatlanayotgan haydovchilarga D-020 Qorasuv–Bo‘ka–Bekobod avtomobil yo‘li orqali Bo‘ka ko‘prigidan o‘ngga burilib, A-373 Toshkent–O‘sh avtomobil yo‘lidan foydalanish tavsiya etildi.

 

Piskent, O‘rta Chirchiq tumanlari va Nurafshon shahridan Toshkentga yo‘l oluvchilar esa D-002 avtomobil yo‘lining 26-kilometridagi “Tekstil” chorrahasi yoki 23-kilometrdagi Gulandon savdo majmuasi oldidan o‘ngga burilib, D-014 G‘azalkent–O‘rta Saroy–Nurafshon avtomobil yo‘li orqali harakatlanishi mumkin.

 

Bundan tashqari, haydovchilar D-002 avtomobil yo‘lining 9-kilometridagi Avangard aholi yashash hududidan mahalliy ahamiyatga ega 10V-111B yo‘li orqali O‘rta Saroy qishlog‘idan A-373 Toshkent–O‘sh avtomobil yo‘liga chiqib, Toshkent tomon harakatlanishlari mumkin.

 

Mas’ullar haydovchilardan vaqtinchalik cheklovni inobatga olib, qatnovlarini oldindan rejalashtirish hamda tavsiya etilgan aylanma yo‘llardan foydalanishni so‘radi.

 

Eslatib o‘tamiz, Toshkent va Nurafshon o‘rtasida BRT (Bus Rapid Transit) tizimini joriy etish rejalashtirilgan. Loyiha amalga oshirilgach, ikki shahar o‘rtasidagi qatnov vaqti qariyb ikki baravar qisqarib, 30 daqiqani tashkil etishi, 150 mingdan ortiq aholining harakatlanishi esa yanada xavfsiz va qulay bo‘lishi kutilmoqda.