Telegram’da narkoshop ochgan sobiq futbolchi ushlandi
U avval ham shu turdagi jinoyat uchun sudlangan bo‘lishiga qaramay, noqonuniy faoliyatini qayta yo‘lga qo‘ygan.
Ichki ishlar vazirligi Tezkor qidiruv departamenti hamda uning hududiy bo‘linmalari tomonidan Telegram messenjerida turli nomlar ostida faoliyat yuritgan botlar orqali giyohvandlik vositalari va psixotrop moddalar savdosi bilan shug‘ullangan shaxsning noqonuniy faoliyatiga chek qo‘yildi.
Ma’lum qilinishicha, botlar faoliyatini boshqargan shaxs ikki oy avval Jinoyat kodeksining 278-8-moddasi uchinchi qismi "a" bandi bilan sudlangan bo‘lishiga qaramay, jinoiy faoliyatini yana davom ettirgan.
Tergov ma’lumotlariga ko‘ra, 1999-yilda tug‘ilgan ushbu fuqaro ilgari professional futbol klubida to‘p surgan, hozirda esa bolalar oromgohida jismoniy tarbiya mashg‘ulotlarini olib borgan. U bir nechta "narkoshop" faoliyatini qayta yo‘lga qo‘ygani aniqlangan.
Surishtiruv davomida unga tegishli Telegram-botlar orqali giyohvandlik vositalari va psixotrop moddalar savdosidan olingan mablag‘lar kriptoaktivlarga aylantirilib, shaxsiy kriptobirja akkaunti orqali turli moliyaviy operatsiyalar amalga oshirilgani aniqlangan.
Dastlabki hisob-kitoblarga ko‘ra, noqonuniy faoliyat davomida 550 million so‘mdan ortiq mablag‘ turli kriptohamyon manzillariga o‘tkazilgan.
Mazkur holat yuzasidan ushbu shaxsga nisbatan Jinoyat kodeksining 278-8-moddasi ikkinchi qismi "a" bandi bilan jinoyat ishi qo‘zg‘atildi. Hozirda tergov harakatlari davom etmoqda.
