Falastinliklar timsohlar bilan qo‘riqlanadi

 

Isroil milliy xavfsizlik vaziri Itamar Ben-Gvir qamoqxonalar xavfsizligini kuchaytirish maqsadida Nil timsohlaridan foydalanish tashabbusini ilgari surdi. Bu haqda Jerusalem Post xabar berdi.

 

Ma’lum qilinishicha, mazkur g‘oya ilk bor 2025-yilda Negev cho‘lidagi yuqori xavfsizlikka ega Ketziot qamoqxonasi atrofida tabiiy himoya to‘sig‘i yaratish taklifi sifatida ilgari surilgan. Ushbu qamoqxonada asosan falastinlik mahbuslar hamda G‘azo mojarosi davomida qo‘lga olingan shaxslar saqlanadi.

 

Avvalroq Nil timsohlari himoya ostidagi tur hisoblangani sababli tashabbusni amalga oshirishning huquqiy imkoniyati mavjud emas edi. Biroq Isroil Atrof-muhitni muhofaza qilish vazirligi sudralib yuruvchilarning huquqiy maqomini o‘zgartirib, ularni muayyan shartlar asosida "asirlikda yetishtirilgan yovvoyi hayvon" toifasiga kiritdi. Bu esa xavfsizlik idoralariga ularni qamoqxona hududida qo‘llash imkonini berishi mumkin.

 

Ben-Gvirning ta’kidlashicha, timsohlardan foydalanish qamoqxonalardan qochish holatlarining oldini olish va qo‘riqlash xarajatlarini kamaytirishga xizmat qilishi mumkin.

 

Biroq tashabbus ekologlar va hayvonlarni himoya qilish tashkilotlari tomonidan tanqid qilinmoqda. Isroil Tabiat va bog‘lar boshqarmasi vakillari Nil timsohlari faqat ilmiy va ta’lim maqsadlarida saqlanishi kerakligini, ularni qamoqxona xavfsizligi uchun ishlatish esa jiddiy xavf tug‘dirishini bildirgan. Mutaxassislar bunday yirtqichlarning qochib ketishi insonlar hayotiga tahdid solishi mumkinligini ham qayd etmoqda.

 

Hozircha loyiha qachon amalga oshirilishi bo‘yicha rasmiy muddat e’lon qilinmagan.