Rossiya Kiyevga besh soat davom etgan yirik raketa hujumini uyushtirdi

Rossiya armiyasi 19-iyulga o‘tar kechasi Kiyevga urush boshlanganidan buyon eng yirik ballistik raketa hujumlaridan birini amalga oshirdi. Besh soat davom etgan zarbalar oqibatida kamida bir kishi halok bo‘ldi, yetti kishi jarohat oldi. Bu haqda The Guardian xabar berdi.

 

Ma’lum qilinishicha, Rossiya poytaxtga qariyb 40 ta "Iskander-M" ballistik va "Sirkon" gipertovushli raketalarini uchirgan. Raketalarning aksariyati bir soatdan kam vaqt ichida Kiyevga yetib kelgan. Kuchli portlashlar oqibatida shaharning tarixiy markazidagi binolar silkinib, ko‘chalarda to‘xtab turgan avtomobillarning signalizatsiyalari ishga tushgan.

 

Eng katta talafot Shevchenkivskiy tumanida qayd etildi. Bu yerda uch qavatli bino yonib ketgan, qutqaruvchilar vayronalar ostidan bir necha kishini olib chiqqan va bir kishining jasadini topgan. 

 

Shuningdek, shaharning yana bir necha tumanida turar joylar, ofis binolari va yotoqxonalarda yong‘inlar yuz bergan. Kuchli portlash to‘lqini oqibatida Lukyanivska metro bekati vestibyulining shipi qulab tushgani sababli bekat vaqtincha yopildi.

 

Ukraina harbiylari hujum davomida 18 ta raketa hamda Rossiya uchirgan 125 ta drondan 108 tasini urib tushirganini ma’lum qildi. Biroq poytaxt infratuzilmasiga jiddiy zarar yetgan.

 

Prezident Volodimir Zelenskiy Rossiyaning tobora kuchayib borayotgan raketa hujumlari fonida mamlakat uchun ballistik raketalardan himoyalanish eng ustuvor vazifaga aylanganini ta’kidladi. Uning so‘zlariga ko‘ra, Ukraina har kuni Patriot havo hujumidan mudofaa tizimlari uchun tutib qoluvchi raketalarga muhtoj.

 

Hujum Kiyevda hukumatga qarshi namoyishlar davom etayotgan pallada sodir bo‘ldi. Norozilik namoyishlari Prezident Zelenskiyning mudofaa vaziri Mixayl Fedorovni lavozimidan ozod etish qaroridan so‘ng boshlangan.

 

Shu bilan birga, Ukraina ham Rossiya hududlariga javob zarbalari bergan. Zelenskiyning ma’lum qilishicha, Moskva va Tambov viloyatlaridagi dronlar ishlab chiqarishda foydalanilgan sanksiya ostidagi butlovchi qismlar va navigatsiya uskunalari saqlangan logistika markazlari nishonga olingan.

 

BMT ma’lumotlariga ko‘ra, 2026-yil iyun oyi Ukrainadagi tinch aholi uchun 2022-yil aprelidan buyon eng ko‘p qurbonlar qayd etilgan davr bo‘lib, bir oy ichida kamida 293 kishi halok bo‘lgan. Ayni paytda urushni yakunlash bo‘yicha muzokaralar to‘xtab qolgan, front chizig‘idagi vaziyat esa deyarli o‘zgarmayapti.