Xorazmda Rossiyadan shokolad ko‘rinishida yuborilgan giyohvand modda aniqlandi
Toshkentda ham kontrabanda yo‘li bilan olib kirilgan gashishni olayotgan shaxs ushlandi.
Xorazm va Toshkentda 1,2 kilogrammdan ortiq gashish aylanmasiga chek qo‘yildi. Bu haqda DXX xabar berdi.
Ma’lum qilinishicha, Xorazm viloyatida o‘tkazilgan tezkor tadbir davomida Urganch shahrida yashovchi, 1997-yilda tug‘ilgan va avval giyohvandlik vositalari bilan bog‘liq jinoyati uchun sudlangan shaxs Urganch xalqaro aeroportida Rossiyadan yuborilgan posilkani qabul qilib olayotgan vaqtida qo‘lga olindi.
Tekshiruv davomida jo‘natma ichidagi turli shirinliklar orasiga shokolad ko‘rinishida yashirilgan 538 gramm gashish borligi aniqlandi.
Yana bir holat Toshkent viloyatining Yuqorichirchiq tumanida qayd etildi. Unda Toshkent shahrida yashovchi 45 yoshli fuqaro narkokuryerlar tomonidan kontrabanda yo‘li bilan O‘zbekistonga olib kirilib, oldindan yashirib qo‘yilgan 700 gramm gashishni qabul qilib olayotgan vaqtida ushlandi.
Mazkur holatlar yuzasidan har ikki fuqaro ustidan jinoyat ishlari qo‘zg‘atilib, tergov harakatlari olib borilmoqda. Shuningdek, ularning ehtimoliy sheriklarini aniqlash bo‘yicha tezkor-qidiruv tadbirlari davom ettirilmoqda.
