Aroqchi: Netanyaxuning maqsadi — Eronni parchalash
Eron tashqi ishlar vaziri Tehron bosimlarga qaramay o‘z suverenitetini himoya qilganini bildirdi.
Eron tashqi ishlar vaziri Abbos Aroqchi Isroil Bosh vaziri Benyamin Netanyaxuni Eronni parchalash va Islom Respublikasini yo‘q qilishga urinishda aybladi.
Vazirning ta’kidlashicha, Netanyaxu Isroilning Erondagi missiyasi hali yakunlanmaganini bildirgan va uning asosiy maqsadi Islom Respublikasini yo‘q qilish ekanini ochiq aytgan.
Aroqchi, shuningdek, Netanyaxu AQSH prezidenti Donald Trampni Eronga qarshi harbiy operatsiya boshlashga undaganini da’vo qilgan.
Eron TIV rahbariga ko‘ra, Tehron bosimlarga qaramay o‘z suverenitetini saqlab qolishga muvaffaq bo‘lgan.
“Dushman dastlab bizdan shartsiz taslim bo‘lishni talab qildi. Biroq yakunda Eron bilan o‘zaro anglashuv memorandumini imzoladi. Bu AQSH Eron suverenitetini hurmat qilishga majbur bo‘lganini anglatadi”, — deya ta'kidlagan Aroqchi.
