Lionel Messi Argentina terma jamoasidagi faoliyatini yakunlashi mumkin

Jahon chempionati–2026 finalida Ispaniyaga mag‘lub bo‘lgan Argentina terma jamoasi sardori Lionel Messi terma jamoadagi faoliyatini yakunlashi mumkin. Bu haqda argentinalik jurnalist Ernan Kastilioga tayanib Goal xabar berdi.

 

Uning ma’lum qilishicha, 39 yoshli futbolchi finaldan keyin kiyim almashtirish xonasida jamoadoshlariga Ispaniyaga qarshi o‘yin Argentina milliy jamoasi safidagi so‘nggi bahsi bo‘lganini aytgan.

 

Biroq bu ma’lumot hozircha rasman tasdiqlangan emas. Messining o‘zi ham milliy jamoadagi faoliyatini yakunlayotgani haqida hech qanday bayonot bermagan.

 

TyC Sports nashri esa bu xabarga ehtiyotkorlik bilan yondashish kerakligini yozdi. Nashr ma’lumotiga ko‘ra, Messi Jahon chempionati boshlanishidan avval xalqaro faoliyati bo‘yicha yakuniy qaror qabul qilmagan va yaqinlariga ham bunday rejasi haqida aytmagan.

 

Finaldan keyin Messi ijtimoiy tarmoqlarda muxlislarga murojaat qilib, jamoani qo‘llab-quvvatlagan barchaga minnatdorlik bildirdi. Shuningdek, u Argentina ketma-ket ikkinchi marta Jahon chempionati finaliga chiqqanini katta yutuq sifatida baholab, Ispaniya terma jamoasini chempionlik bilan tabrikladi.

 

2026 yilgi Jahon chempionatida Lionel Messi 8 ta uchrashuvda ishtirok etib, 8 ta gol urdi va 4 ta golli uzatmani amalga oshirdi.

 

Eslatib o‘tamiz, Messi 2016 yilgi Amerika kubogi finalidagi mag‘lubiyatdan keyin ham Argentina terma jamoasidan ketishini e’lon qilgan edi. Ammo bir necha oy o‘tib qarorini o‘zgartirib, milliy jamoaga qaytdi. Keyinchalik u Argentina bilan 2021 va 2024 yilgi Amerika kubogi hamda 2022 yilgi Jahon chempionatida g‘oliblikni qo‘lga kiritdi.