Prezident Nurafshonda Kelajak texnologiyalari markazi qurilishiga tamal toshi qo‘ydi

Prezident Shavkat Mirziyoyev Nurafshon shahrida axborot xavfsizligi va raqamli texnologiyalarga ixtisoslashgan “Cyber University” davlat universiteti faoliyati bilan tanishdi.

 

 

Davlat rahbariga universitetda axborot va kiberxavfsizlik, sun’iy intellekt, robototexnika, kiberhuquq, raqamli kriminalistika hamda kiberiqtisodiyot yo‘nalishlari bo‘yicha mutaxassislar tayyorlanayotgani haqida ma’lumot berildi. Hozirda oliygohda qariyb ming nafar talaba tahsil olmoqda.

 

Prezident talabalar bilan muloqot qilib, kelgusida raqamli texnologiyalar sohasidagi mutaxassislarga ehtiyoj yanada ortishini ta’kidladi.

 

 

Shundan so‘ng Shavkat Mirziyoyev universitetga tutash hududda barpo etiladigan Kelajak texnologiyalari markazi qurilishiga tamal toshi qo‘yish marosimida ishtirok etdi.

 

Davlat rahbari o‘z nutqida bugungi kunda raqobat raqamli texnologiyalar va sun’iy intellektni o‘zlashtirish darajasi bilan belgilanayotganini qayd etdi.

 

 

“Hayotimizning barcha jabhalarini raqamlashtirish bilan jiddiy shug‘ullanmasdan turib, rivojlanish mumkin emas. Busiz kelajagimiz yo‘qligini barchamiz teran anglashimiz kerak”, — dedi Prezident.

 

Ma’lum qilinishicha, umumiy maydoni 36 gektarni tashkil etadigan markaz qurilishiga qariyb 500 million dollar investitsiya jalb qilinadi. U ta’lim, ilmiy tadqiqot, texnologik sinov va ishlab chiqarishni birlashtiruvchi innovatsion ekotizim bo‘ladi.

 

 

Markazda kiberxavfsizlik, sun’iy intellekt, bulutli texnologiyalar va kriptografiya yo‘nalishlarida zamonaviy laboratoriyalar, sun’iy intellekt data-markazi, muhandislik klasteri, yuqori texnologiyali mahsulotlar ishlab chiqarish markazi hamda dron va robototexnika vositalarini sinovdan o‘tkazish poligoni tashkil etilishi rejalashtirilgan.

 

 

Loyiha doirasida yetakchi xorijiy kompaniyalar va universitetlarni jalb qilish, mahalliy texnologiyalarni tijoratlashtirish hamda innovatsion mahsulotlarni xalqaro bozorga olib chiqish uchun platforma yaratiladi.

 

 

Qayd etilishicha, markazda 5 mingdan ortiq yuqori malakali ish o‘rni yaratiladi. Shuningdek, marosimda Xitoy, Rossiya va Germaniya kompaniyalari ishtirokida umumiy qiymati 465 million dollarlik 9 ta yangi loyiha qurilishiga ham start berildi. Ushbu loyihalar ishga tushgach, yana 5 mingta yangi ish o‘rni yaratilishi kutilmoqda.