Tramp Janni Infantinoni BMT Bosh kotibi lavozimiga tavsiya qilmoqchi
AQSh prezidenti FIFA rahbarini dunyo miqyosida hurmatga sazovor va xalqlarni birlashtira oladigan yetakchi sifatida baholamoqda.
AQSh prezidenti Donald Tramp FIFA prezidenti Janni Infantinoni BMTning navbatdagi Bosh kotibi lavozimiga ilgari surishni rejalashtirmoqda. Bu haqda The New York Post (NYP) o‘z manbalariga tayanib xabar berdi.
Nashr ma’lumotiga ko‘ra, Tramp Janni Infantinoni dunyo miqyosida hurmat qozongan va turli mamlakatlar hamda xalqlarni birlashtirish qobiliyatiga ega shaxs sifatida baholamoqda.
Qayd etilishicha, Tramp va Infantino 2026-yilgi futbol bo‘yicha Jahon chempionati davomida yanada yaqin hamkorlik qilgan.
Shu bilan birga, nashr Trampning ehtimoliy tashabbusi BMTdagi geografik rotatsiya tamoyiliga mos kelmasligini eslatgan. Amaldagi qoidalarga ko‘ra, navbatdagi Bosh kotib Lotin Amerikasi yoki Karib havzasi davlatlaridan nomzod bo‘lishi kutilmoqda. Biroq, The New York Post manbalariga ko‘ra, bu holat Infantino nomzodi uchun hal qiluvchi to‘siq bo‘lmasligi mumkin.
Trampning global hamkorlik bo‘yicha maxsus elchisi va Dominikan Respublikasining BMTdagi sobiq elchisi Paolo Zampolli nashrga bergan izohida Janni Infantinoning xalqaro tajribasi va muzokara olib borish salohiyati BMT rahbari lavozimida samarali faoliyat yuritishiga xizmat qilishini ta’kidlagan.
Ma’lumotlarga ko‘ra, BMT Bosh kotibi saylovlari joriy yilning dekabr oyida o‘tkazilishi rejalashtirilgan. Hozirda ushbu lavozim uchun bir necha nomzod, jumladan Chilining sobiq prezidenti Mishel Bachelet hamda MAGATE bosh direktori Rafael Grossi nomzodi tilga olinmoqda.
