Prezident Shavkat Mirziyoyev Yangi Toshkentdagi yirik qurilish obyektlarini ko‘zdan kechirdi

Prezident Shavkat Mirziyoyev Yangi Toshkent shahrida amalga oshirilayotgan bunyodkorlik ishlari bilan tanishdi. Davlat rahbari dastlab Yangi Toshkent shahrini barpo etish direksiyasiga tashrif buyurdi. U yerda shaharning bosh rejasi, yirik obyektlarning joylashuvi va navbatdagi qurilish bosqichlari taqdim etildi.

 

 

Taqdimot davomida transport va muhandislik infratuzilmasini qurilishlar bilan uyg‘un rivojlantirish, yashil hududlar va jamoat makonlarini bog‘lash, shuningdek, Yangi Toshkentni amaldagi poytaxt bilan integratsiya qilish masalalari muhokama qilindi. Prezident barcha loyihalarni yagona shaharsozlik konsepsiyasi asosida yuqori sifat bilan amalga oshirish zarurligini ta’kidladi.

 

 

Shundan so‘ng davlat rahbari Yangi Toshkentda bunyod etilayotgan Nizomiy nomidagi O‘zbekiston milliy pedagogika universiteti kampusini ko‘zdan kechirdi. Majmua tarkibidan o‘quv binolari, ilmiy laboratoriyalar, elektron kutubxona, talabalar turar joylari, sport va madaniyat inshootlari o‘rin oladi. Unda xalqaro ta’lim standartlarini bosqichma-bosqich joriy etish hamda boshqaruv tizimini transformatsiya qilish rejalashtirilgan.

 

 

Prezident, shuningdek, O‘zbekiston Milliy kutubxonasining yangi binosidagi qurilish ishlari bilan ham tanishdi. Umumiy maydoni 30 ming kvadrat metrdan ortiq bo‘lgan to‘rt qavatli bino bir vaqtning o‘zida 1 420 nafar kitobxonga xizmat ko‘rsatish imkoniyatiga ega bo‘ladi. Hozirda obyektda qurilish va pardozlash ishlarining 90 foizi yakunlangan bo‘lib, uni joriy yil foydalanishga topshirish rejalashtirilgan.

 

 

Tashrif davomida "Yangi O‘zbekiston" universitetining yangi kampusi ham ko‘zdan kechirildi. 50 gektar maydonda qurilayotgan majmua 10 ming nafar talabaga mo‘ljallangan bo‘lib, unda fakultetlar, kutubxona, muzey, multimedia zallari, sport majmuasi, suzish havzasi va talabalar turar joylari barpo etiladi.

 

 

Prezident Yangi Toshkentda bunyod etilayotgan zamonaviy futbol stadioni qurilishi bilan ham tanishdi. 55 ming tomoshabinga mo‘ljallangan arena FIFA talablariga muvofiq barpo etilmoqda. Qurilish ishlari 2025-yil noyabrida boshlangan bo‘lib, bugungi kunga qadar ularning 65 foizi bajarilgan.

 

 

Ma’lum qilinishicha, stadion 2027-yilda 20 yoshgacha bo‘lgan futbolchilar o‘rtasidagi jahon chempionatining yarim final va final uchrashuvlariga mezbonlik qilishi rejalashtirilgan. Stadion hududida mashg‘ulot maydonlari, 5,5 ming o‘rinli avtoturargoh va metro bekati ham barpo etiladi.

 

 

Tashrif yakunida Prezident barcha obyektlarda qurilish va jihozlash ishlarini belgilangan muddatlarda, yuqori sifat bilan yakunlash hamda ularni Yangi Toshkentning umumiy shaharsozlik konsepsiyasi bilan uyg‘unlashtirish yuzasidan mutasaddilarga tegishli topshiriqlar berdi.