Rossiyada O‘zbekiston fuqarosi terrorchilar bilan aloqani yashirgani uchun hibsga olindi
Erkak xalqaro qidiruvdagi terrorchilik tashkiloti a’zosi bilan olti oy davomida muntazam muloqot qilgan.
Rossiyaning Sankt-Peterburg shahrida O‘zbekiston fuqarosi terrorchilik tashkiloti vakilining yollashga urinishlari haqida huquqni muhofaza qiluvchi organlarga xabar bermagani uchun qo‘lga olindi. Bu haqda TASS huquq-tartibot idoralaridagi manbalariga tayanib xabar berdi.
Ma’lum qilinishicha, 1999-yilda tug‘ilgan O‘zbekiston fuqarosi o‘tgan yil kuzida Telegram orqali Rossiyada taqiqlangan "Islom davlati" (IShID) terrorchilik tashkilotining xalqaro qidiruvda bo‘lgan a’zolaridan biri bilan aloqaga kirishgan. Manbaga ko‘ra, ular o‘rtasidagi yozishmalar qariyb olti oy davom etgan.
Tergov ma’lumotlariga ko‘ra, suhbat davomida terrorchilik tashkiloti vakili erkakni IShID safiga qo‘shilishga, Suriyaga borib jangovar harakatlarda qatnashishga hamda terrorchilik faoliyatini moliyaviy qo‘llab-quvvatlash uchun pul o‘tkazishga undagan.
Huquqni muhofaza qiluvchi organlarga ushbu yollashga urinishlar haqida xabar bermagani sababli unga nisbatan Rossiya Jinoyat kodeksining 205.6-moddasi ("Jinoyat haqida xabar bermaslik") bilan jinoyat ishi qo‘zg‘atilgan. Mazkur modda bo‘yicha bir yilgacha ozodlikdan mahrum qilish jazosi nazarda tutilgan.
Ayni paytda tergov harakatlari davom etmoqda. Agar terrorchilik tashkilotiga pul o‘tkazilgani tasdiqlansa, gumonlanuvchiga terrorchilik faoliyatiga ko‘maklashish ayblovi ham qo‘yilishi mumkin. Rossiya qonunchiligiga ko‘ra, bunday jinoyat uchun 15 yilgacha ozodlikdan mahrum qilish jazosi belgilangan.
