UEFA FIFA tijoriy rejasidan voz kechmasa, JCHni boykot qiladi
UEFA va unga a’zo 55 ta milliy futbol assotsiatsiyasi FIFA Jahon chempionati bo‘yicha yangi tijoriy rejasini bekor qilmasa, tashkilot musobaqalarida ishtirok etmasligini ma’lum qildi.
Financial Times xabariga ko‘ra, UEFA payshanba kuni onlayn formatda o‘tkazilgan favqulodda yig‘ilishda FIFAning yangi tijoriy loyihasiga qarshi chiqdi. Qarorga ko‘ra, agar FIFA ushbu rejadan voz kechmasa, UEFAga a’zo mamlakatlar FIFA musobaqalarini, jumladan Jahon chempionatini boykot qiladi.
UEFA bayonotida qayd etilishicha, FIFA taklifi to‘liq bekor qilinmaguncha tashkilotga a’zo birorta ham milliy terma jamoa FIFA turnirlarida qatnashmaydi.
Gap FIFA prezidenti Janni Infantino ilgari surgan, qiymati 20 milliard dollarga baholanayotgan yangi tijoriy tuzilmadagi 20 foiz ulushni xususiy investorlarga sotish rejalari haqida bormoqda. FIFA ushbu bitimdan tushadigan mablag‘ni o‘zining 211 ta a’zo assotsiatsiyasiga yo‘naltirishni, har biriga oldindan 20 million dollardan ajratishni rejalashtirgan. Biroq UEFA bu tashabbusni keskin rad etdi.
“Jahon chempionatiga investitsiya mahsuloti sifatida qarash mumkin emas. Uning hech bir qismi xususiy investorlarga topshirilmasligi kerak. Jahon chempionati sotilmaydi”, — deyiladi tashkilot bayonotida.
Nashrning qayd etishicha, UEFA tarkibiga Ispaniya, Fransiya va Angliya kabi futbolning yetakchi davlatlari kiradi. Shu bois Yevropa jamoalarisiz Jahon chempionatining tijoriy jozibadorligi sezilarli darajada pasayishi mumkin.
Boykot qarori FIFA va UEFA o‘rtasidagi so‘nggi yillardagi eng jiddiy qarama-qarshiliklardan biri sifatida baholanmoqda. Angliya futbol assotsiatsiyasi ham UEFA pozitsiyasini qo‘llab-quvvatlashini ma’lum qilgan.
FIFA’ning sobiq prezidenti Zepp Blatter ham Jahon chempionatini boshqarish uchun alohida kompaniya tashkil etish va uning 20 foiz ulushini tashqi investorlarga taklif qilish rejasini keskin tanqid qilgandi.
