Ufada O‘zbekiston fuqarosi daryoda cho‘kib ketdi
U cho‘milish taqiqlangan hududda kuchli oqimni yenga olmagan.
Rossiyaning Ufa shahrida O‘zbekiston fuqarosi Belaya daryosida cho‘kib ketdi. Hodisa “Kamennaya perepravi” hududidagi ko‘prik ostida, cho‘milish xavfli deb belgilangan joyda sodir bo‘lgan.
Mahalliy ma’lumotlarga ko‘ra, erkak jazirama tufayli cho‘milmoqchi bo‘lgan, biroq kuchli oqimni yenga olmay suvga cho‘kkan.
Ufa Fuqarolik muhofazasi boshqarmasi ma’lumotiga ko‘ra, 22–28-iyul kunlari qutqaruvchilar 87 kishiga, jumladan, 33 nafar bolaga yordam ko‘rsatgan. Belaya daryosidagi “Solnechniy” plyajida esa 74 kishi qutqarib qolingan.
Qayd etilishicha, o‘tgan yil davomida suvdan jami 30 kishi, jumladan sakkiz nafar bola qutqarilgan. Bu esa joriy yilning iyul oyidagi bir haftada qutqarilganlar soni o‘tgan yozgi mavsumdagi ko‘rsatkichdan qariyb uch baravar ko‘p ekanini anglatadi.
Mutaxassislar buni havo haroratining yuqoriligi va Belaya hamda Ufa daryolarida suv sathining balandligi bilan izohlamoqda. Ularning ta’kidlashicha, kuchli oqim saqlanib qolayotgani sababli shaharda daryolarda cho‘milish taqiqi hamon amal qilmoqda. Aholiga daryolar o‘rniga ko‘llarda cho‘milish tavsiya etilgan.
