O'zbekistonda zamonaviy basseyn qurgan tadbirkorlarga 100 mln so‘mgacha subsidiya beriladi
2028-yilgacha foydalanishga topshiriladigan dastlabki 100 ta basseyn uchun qurilish va ishga tushirish xarajatlarining 50 foizigacha qismi qoplab beriladi.
Hukumat zamonaviy suzish havzalari (basseynlar) qurilishini rag‘batlantirish maqsadida yangi subsidiya mexanizmini joriy etdi. Bu haqda Turizm qo'mitasi xabar berdi.
Endilikda tadbirkorlar qurilish va foydalanishga topshirish xarajatlarining 50 foizigacha, biroq 100 mln so‘mdan oshmagan qismini davlat hisobidan qoplab olishi mumkin.
Hukumat qarori bilan “Yangi zamonaviy suzish havzalarini (basseyn) qurish va ishga tushirish bilan bog‘liq xarajatlarni qoplash bo‘yicha davlat xizmatini ko‘rsatish”ning ma’muriy reglamenti tasdiqlandi.
Unga ko‘ra, subsidiya 2026-yil 1-fevraldan 2028-yil 1-yanvargacha foydalanishga topshiriladigan dastlabki 100 ta zamonaviy suzish havzasi uchun ajratiladi.
Subsidiya olishni istagan tadbirkor soliq va boshqa majburiy to‘lovlar bo‘yicha qarzdor bo‘lmasligi, qayta tashkil etish yoki tugatish jarayonida bo‘lmasligi, faoliyati qonunchilikka muvofiq vaqtincha to‘xtatilmagan hamda sud qarori bilan to‘lovga qobiliyatsiz deb topilmagan bo‘lishi kerak.
Arizalar Davlat xizmatlari markazlari yoki Yagona interaktiv davlat xizmatlari portali (YaIDXP) orqali Turizm qo‘mitasiga taqdim etiladi.
Arizaga suzish havzasining loyiha hujjatlari, qurilish va ishga tushirish bo‘yicha pudrat shartnomasi hamda amalga oshirilgan to‘lovlarni tasdiqlovchi elektron hujjatlar ilova qilinadi.
Turizm qo‘mitasi subsidiya ajratish to‘g‘risida qaror qabul qilganidan so‘ng, mablag‘lar 10 ish kuni ichida talabgorning hisob raqamiga o‘tkazib beriladi.
Mazkur mexanizm hududlarda turizm va sport infratuzilmasini rivojlantirish, sog‘lom turmush tarzini ommalashtirish hamda yangi investitsiya loyihalarini qo‘llab-quvvatlashga qaratilgan.
