Jizzax va Parkentda ming tonnadan ortiq asfalt talon-toroj qilindi
Tekshiruvlarda jami 1 174 tonna asfalt va 672,7 mln so‘m byudjet mablag‘lari bilan bog‘liq qonunbuzarliklar fosh etilgan.
Jizzax viloyatining Sharof Rashidov tumani hamda Toshkent viloyatining Parkent tumanida obodonlashtirish boshqarmalari mansabdor shaxslari ishtirokida ming tonnadan ortiq asfaltni talon-toroj qilish holatlari fosh etildi.
Bosh prokuratura huzuridagi Departamentning Sharof Rashidov tumani bo‘limi tomonidan o‘tkazilgan tergovga qadar tekshiruvda tuman Obodonlashtirish boshqarmasi mas’ul shaxslari 6 ta ichki yo‘lda asfaltlash ishlarini amalda bajarmagan holda, xarid qilingan qiymati 348,7 mln so‘mlik 634 tonna asfaltni naqd pulga sotib yuborgani va mablag‘larni o‘z ehtiyojlari uchun ishlatgani aniqlangan.
Shuningdek, Departamentning Parkent tumani bo‘limi o‘tkazgan tekshiruvda tuman Obodonlashtirish boshqarmasi mas’ul shaxslari o‘zaro til biriktirib, “G.W.” MChJ tomonidan 540 tonna asfalt yetkazib berilmagan bo‘lsa-da, mahsulot qabul qilingani haqida soxta hisob-fakturalar rasmiylashtirgani ma’lum bo‘lgan. Natijada 324 mln so‘m miqdoridagi byudjet mablag‘lari o‘zlashtirilgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atildi. Hozirda tergov harakatlari davom ettirilmoqda.
