Qashqadaryodagi Taxtaqoracha dovonida yong‘in yuz berdi
Hodisa oqibatida 1,3 gektar maydondagi quruq o‘tlar yonib ketgan, daraxt va butalarga zarar yetmagan.
Qashqadaryo viloyatining Kitob tumani hududidagi Taxtaqoracha dovonida sodir bo‘lgan yong‘in qisqa vaqt ichida bartaraf etildi.
Ma’lum qilinishicha, yong‘in 2-avgust kuni soat 13:50 atrofida Kitob davlat o‘rmon xo‘jaligi hududida yuzaga kelgan. Yong‘inni bartaraf etishga Kitob davlat o‘rmon xo‘jaligi, tuman Ekologiya va iqlim o‘zgarishi bo‘limi hamda Kitob, Shahrisabz va Yakkabog‘ tumanlari Favqulodda vaziyatlar bo‘limlari xodimlari jalb etilgan. Tezkor choralar natijasida yong‘in soat 14:30 da to‘liq o‘chirildi.
Dastlabki ma’lumotlarga ko‘ra, yong‘in natijasida 1,3 gektar maydondagi quruq o‘tlar zarar ko‘rgan. O‘rmon hududidagi mavjud daraxt va butalarga shikast yetmagan.
Hozirda voqea joyida o‘rmon xo‘jaligi va ekologiya xodimlaridan iborat navbatchilik guruhi faoliyat yuritmoqda. Yong‘inning kelib chiqish sabablari o‘rganilayotgani bildirildi.
Mutasaddilar fuqarolarni yozning issiq kunlarida tog‘li hududlar hamda avtomobil yo‘llari bo‘yidagi o‘rmon fondi yerlarida yong‘in xavfsizligi qoidalariga qat’iy amal qilishga va tabiatga ehtiyotkorona munosabatda bo‘lishga chaqirdi.
