Rossiyada davlat bayrog‘ini tahqirlashda gumonlangan o‘zbekistonlik ayol vatanga qaytariladi
Migratsiya agentligi Rossiyaning Nijniy Novgorod viloyatidagi holat yuzasidan munosabat bildirdi.
Rossiyaning Nijniy Novgorod viloyatida huquqni muhofaza qiluvchi organlar tomonidan o‘tkazilgan nazorat tadbirlari vaqtida O‘zbekiston fuqarolari ishtirok etgani aks etgan videolar ijtimoiy tarmoqlarda tarqaldi.
Xabarlarga ko'ra, viloyatda o‘tkazilgan reyd davomida politsiya yerda yotgan Rossiya bayrog‘i tushirilgan poyandozni ko‘rib qolgan. Mazkur holat bo‘yicha ayolga nisbatan “Rossiya davlat bayrog‘ini tahqirlash” moddasi bo‘yicha jinoiy ish qo‘zg‘atish masalasi ko‘rib chiqilayotgan edi. Holat yuzasidan Migratsiya agentligi rasmiy munosabat bildirdi.
Agentlik ma’lum qilishicha, mazkur holat zudlik bilan nazoratga olingan. Rossiyadagi vakolatxona hamda O‘zbekistonning Qozon shahridagi Bosh konsulxonasi Rossiyaning tegishli davlat organlari bilan hamkorlikda voqea tafsilotlariga aniqlik kiritish va O‘zbekiston fuqarolarining huquq hamda qonuniy manfaatlarini ta’minlash bo‘yicha ish olib bormoqda.
Shuningdek, videoda aks etgan O‘zbekiston fuqarosi M.S. bilan aloqa o‘rnatilgani bildirildi. Unga konsullik-huquqiy yordam ko‘rsatilmoqda.
Ma’lum qilinishicha, Migratsiya jamg‘armasi mablag‘lari hisobidan fuqaroning O‘zbekistonga qaytishi uchun aviachipta rasmiylashtirilgan. Uning 6-avgust kuni O‘zbekistonga qaytishi rejalashtirilgan.
