Rossiyaning Gelenjik kurortidagi plyajga dron qulashi oqibatida 7 kishi halok bo‘ldi

Rossiyaning Krasnodar o‘lkasidagi Gelenjik shahri yaqinida joylashgan Arxipo-Osipovka qishlog‘idagi plyajga uyushtirilgan dron hujumi oqibatida 7 kishi, jumladan 3 nafar bola halok bo‘ldi. Yana 47 kishi turli darajada tan jarohati oldi. Bu haqda Vedmosti xabar berdi.

 

Krasnodar o‘lkasi tezkor shtabi ma’lumotiga ko‘ra, hujum 3-avgust kuni ertalab sodir bo‘lgan. Dastlab 13 nafar jabrlangan haqida xabar berilgan bo‘lsa, keyinchalik qurbonlar va jabrlanganlar soniga aniqlik kiritilgan.

 

Gelenjik shahar-kurorti rahbari Aleksey Bogodistovning bildirishicha, jabrlanganlarning 21 nafari shifoxonaga yotqizilgan, 19 nafarga ambulator tibbiy yordam ko‘rsatilgan.

 

Hodisadan so‘ng Arxipo-Osipovkada tezkor shtab tashkil etildi. Voqea joyiga favqulodda vaziyatlar tibbiyoti bo‘yicha ixtisoslashtirilgan brigada yuborilgan. Shuningdek, Gelenjik, Tuapse va Krasnodar shaharlaridan tez tibbiy yordam brigadalari jalb etilgan.

 

Hodisaga Rossiya Tashqi ishlar vazirligi ham munosabat bildirdi. Vazirlik rasmiy vakili Mariya Zaxarova NATO va Yevropa Ittifoqini terrorizmga nisbatan ilgari bildirgan pozitsiyasidan chekinishda aybladi.

 

Ukraina Telegram-kanallari dron radioelektron kurash (REK) vositalari ta’siri oqibatida boshqaruvni yo‘qotib, plyajga qulaganini da’vo qilmoqda.

 

Rossiya Mudofaa vazirligi ma’lumotiga ko‘ra, 3-avgustga o‘tar kechasi Krasnodar o‘lkasi va Qora dengiz akvatoriyasi Ukraina tomonidan dronlar bilan hujumga uchragan. Vazirlik ushbu hududlar osmonida uchuvchisiz uchish apparatlari yo‘q qilinganini, Rossiya hududi uzra jami 131 ta dron urib tushirilganini ma’lum qildi.